27 март куни Хитойдан Ўзбекистонга 1 миллион доза ZF-UZ-VAC2001 вакцинаси олиб келинади. Бу ҳақда Инновацион ривожланиш вазирлигига таяниб, «Подробно» хабар берди.
Учинчи фазаси Ўзбекистонда синовдан ўтказилаётган вакцинани республиканинг ўзида ҳам ишлаб чиқариш режалаштирилган. Аввалроқ инновацион ривожланиш вазири Иброҳим Абдураҳмонов ZF-UZ-VAC 2001 вакцинасини тарқатиш май—июнда бошланишини маълум қилганди.
Эслатиб ўтамиз, Ўзбекистонда коронавирусга қарши илк вакцина сифатида Хитойнинг Zhifei Longcom Biopharmaceutical Co. Ltd компанияси билан ҳамкорликда ишлаб чиқарилган вакцина 1 март куни давлат рўйхатидан ўтказилган. Ўзбекистоннинг ҳиссаси ва саъй-ҳаракатларини инобатга олиб, компания ZF 2001 вакцинани бирга яратган ҳаммуаллиф мамлакат сифатида белгилади. Ушбу янги вакцинани ZF-UZ-VAC 2001 номи билан ишлаб чиқариш ва фойдаланишга келишилган.
Вакцина коронавируснинг «британча» ва «африкача» штаммларига қарши Moderna вакцинасидан олти баробарга яхшироқ бўлиб чиққани маълум қилинган.
Хитой компанияси мазкур вакцинани ҳамкорликда ишлаб чиқариш учун Ўзбекистонда фаолият юритаётган бир қатор фармацевтика корхоналари фаолиятини ўрганиб, лаборатория ҳамда техник ва ишлаб чиқариш қувватларини инобатга олиб, Jurabek Laboratories МЧЖ қўшма корхонасини танлаган.
Ушбу вакцина 1 март куни давлат рўйхатидан ўтказилган. Кейинроқ Ўзбекистон коронавирусга қарши 1 миллион доза ZF-UZ-VAC 2001 вакцинасини сотиб олиш бўйича келишувга эришди.
Аввалроқ Тошкентга AstraZeneca вакцинасининг 660 минг дозаси олиб келингани, мамлакатда аҳолини коронавирусга қарши 1 апрелдан эмлаш бошланиши тўғрисида хабар берилганди.
Изоҳ (0)