Farg‘onada Navro‘z bayrami munosabati bilan bir qator yangi sanoat va ishlab chiqarish korxonalarning ochilish marosimi bo‘lib o‘tdi. Tadbirlarda viloyat hokimi Xayrulla Bozorov ishtirok etdi, deya xabar berdi “Daryo” muxbiri Azizjon Ermatov.
Qayd etilishicha, Farg‘ona shahrida foydalanishga topshirilgan Constant trading korxonasi jinsi matolar va erkaklar jinsi shimlarini ishlab chiqarishga ixtisoslashgan.
Birlashgan Arab Amirligining Alpha international Consultansy DMCC kompaniyasi bilan hamkorlikda sobiq pillani qayta ishlash fabrikasi hududida tashkil etilgan korxonaga 4,1 million dollar mablag‘ sarf etilgan. Turkiya va Xitoyning zamonaviy uskuna va dastgohlari o‘rnatilgan yangi korxonada 200 dan ziyod ish o‘rni yaratilgan. Bu yerda yiliga o‘rtacha 2 million pogonometrdan ziyod jinsi matosi hamda 1,5 million donadan ortiq jinsi shim ishlab chiqarish ko‘zda tutilgan.
Shu kuni Farg‘ona shahrida Max Oil Group neft va gaz kondensatlarini qayta ishlash korxonasi ham ish boshladi.
Loyiha qiymati 2,5 million dollarni tashkil etadigan ushbu korxona Rossiyada ishlab chiqarilgan uskunalar bilan jihozlangan. Yiliga 48 ming tonna neft va gaz kondensatlarini qayta ishlash quvvatiga ega bo‘lgan korxonada 150 ta yangi ish o‘rni yaratilgan. Korxonada bir yilda 500 milliard so‘mlik mahsulot ishlab chiqarish ko‘zda tutilgan.
Ayni paytda korxonada benzin, solyarka, kerosin, dizel yoqilg‘ilari bilan birgalikda motor moylari ham qayta ishlanmoqda. Kelgusida neftni to‘laqonli qayta ishlash sikliga o‘tib, bitum ishlab chiqarish ham rejalashtirilgan.
Ta’kidlanishicha, Toshloq tumanida “Farg‘ona neft mahsulotlari” korxonasining birinchi bosqichi ishga tushirilgan. Korxonada ekstra benzin, avtomobil yoqilg‘isi, uch turdagi dizel yoqilg‘isi, kerosin, pech yoqilg‘isi, mazut kabi keng turdagi iste’mol mahsulotlari ishlab chiqariladi.
45 milliard so‘m mablag‘ sarflangan ushbu loyiha to‘liq ishga tushirilsa, 150 nafardan ziyod yangi ish o‘rni yaratiladi. Korxonada kuniga 120 tonna neft va gaz kondensatlari qayta ishlanib, yuqori sifatli mahsulotlar tayyorlanmoqda.
Shu kuni Toshloq tumanida “Farovon” asfalt-beton ishlab chiqarish korxonasining ham ochilishi marosimi bo‘lib o‘tdi. Loyiha qiymati 6,5 milliard so‘m bo‘lgan korxonada hozirda 15 ta ish o‘rni yaratilgan.
Izoh (0)