Navoiy viloyatining Karmana tumanidagi “Alisher Navoiy” mahalla fuqarolar yig‘inida yashovchi va chiqindixonalarda tirikchilik qilib kelayotgan shaxs sherigini do‘pposlab o‘ldirib qo‘ydi. Navoiy viloyat IIB axborot xizmati rahbari O‘ktam Usmonovning “Daryo”ga xabar berishicha, voqea 2021-yilning 23-mart kuni tunda sodir bo‘lgani bois fuqaroning o‘lgani bir kundan keyin aniqlangan.
Ta’kidlanishicha, 49 yoshli fuqaro R.I. hamda 32 yoshli M.Ch. chiqindixonalardagi plastmassa idish va karton qog‘ozlarni to‘plab, sotish orqali tirikchilik qilib kelgan. Mahalla vakillari hamda profilaktika inspektori ham ularning doimiy ravishda spirtli ichimlik iste’mol qilib yurishidan xabardor bo‘lgan.
Ma’lum bo‘lishicha, 2021-yilning 23-mart kuni fuqaro R.I. sherigi M.Ch.ning yashash xonadoniga borgan. Ular kunbo‘yi spirtli ichimlik iste’mol qilgan. Mast holda janjallashgan tanishlar bir-birini do‘pposlagan. R.I. sherigi M.Ch.ga hayoti va sog‘lig‘i uchun xavfli bo‘lgan tan jarohatlari yetkazgan. M.Ch. hushidan ketib yiqilgach, mast holatdagi R.I. uning xonadonidan chiqib ketgan. Xonadon darvozasi ochiq qoldirilgan.
24-mart, chorshanba kuni ertalab hudud profilaktika inspektori fuqaro M.Ch.ning xonadon darvozasi ochiq qolganini ko‘rgan. Shundan so‘ng fuqaroga og‘ir tan jarohati yetkazilgani, birinchi tez tibbiy yordam ko‘rsatilmagani oqibatida vafot etgani aniqlangan.
Karmana tuman ichki ishlar bo‘limi xodimlari tomonidan olib borilgan tezkor surishtiruv ishlari davomida fuqaro M.Ch.ning hayotiga uning sherigi R.I.ning suiqasd qilgani oydinlashgan.
Mazkur holat viloyat prokuraturasi, viloyat IIB, tuman sektor rahbarlari hamda keng jamoatchilik ishtirokida muhokama qilingan.
“Qo‘ni-qo‘shnilar, mahalla aholisi o‘rtasidagi befarqlik, ko‘rib-ko‘rmaslikka olish — sodir bo‘layotgan jinoyatlarga sheriklik, degani. Mahalla raisi hamda hudud profilaktika inspektorining aytishicha, go‘yoki xonadonda sog‘lom muhit mavjud ekan. Muntazam ravishda chiqindi va makalatura sotish bilan tirikchilik qilayotgan, har doim spirtli ichimlik iste’mol qilib yurishganini ko‘rishgan bo‘lsa, buni qanday qilib oiladagi sog‘lom muhit deb baholash mumkin?! Mana shunday e’tiborsizlik, loqaydlik, befarqlik oqibatida inson jinoyatga qo‘l urmoqda. Profilaktik tadbirlar o‘tkazish, tushuntirish ishlari olib borish bilan masala hal bo‘lmaydi. Achinarlisi, fuqaroning hovlisi axlatxona chiqindilari bilan to‘la, atrof bijg‘ib yotibdi. Qani mahalla-ko‘y, qani sanitariya va epidemiologiya vakillari? Maxsus avtoxo‘jalik tashkiloti xodimlari axlatxonalardamas, xonadonlarda to‘planayotgan chiqindilarni ko‘rishmayaptimi?! Har bir holat ortida inson taqdiri yotibdi. Demak, hududlardagi krimogen vaziyatlarni to‘liq nazoratga olish har bir xodimning burchi”, — dedi muhokamada so‘z olgan viloyat IIB boshlig‘ining birinchi o‘rinbosari, polkovnik Ilhom Tillayev.
Qo‘shimcha qilinishicha, Karmana tuman ichki ishlar bo‘limi huzuridagi tergov bo‘limi tomonidan I.R.ga nisbatan Jinoyat kodeksining 104-moddasi (qasddan badanga og‘ir shikast yetkazish) bilan jinoyat ishi qo‘zg‘atilgan.
Izoh (0)