O‘zbekistonda koronavirusga qarshi Xitoy vaksinasini hamkorlikda ishlab chiqarish uchun qaysi kompaniya tanlangani ma’lum bo‘ldi

O‘zbekiston Xitoyning Zhifei Longcom Biopharmaceutical kompaniyasi tomonidan yaratilgan ZF 2001 vaksinasining hammuallifi sifatida tan olingani haqida xabar berilgan edi.

Xitoy kompaniyasi mazkur vaksinani hamkorlikda ishlab chiqarish uchun O‘zbekistonda faoliyat yuritayotgan bir qator farmatsevtika korxonalari faoliyatini o‘rganib, laboratoriya hamda texnik va ishlab chiqarish quvvatlarini inobatga olib, Jurabek Laboratories MChJ qo‘shma korxonasini tanlandi. O‘zAning xabar berishicha, bu haqda maxsus komissiya yig‘ilishida ma’lum qilindi.

Endilikda ushbu yangi vaksina ZF-UZ-VAC 2001 nomi bilan ishlab chiqariladi.

Yig‘ilishda, shuningdek, ushbu vaksinaning mamlakatda uchinchi bosqich sinovlari muvaffaqiyatli o‘tkazilayotgani va O‘zbekiston bu vaksina yaratilishi va ishlab chiqarilishida hammuallif davlat etib belgilanganini inobatga olib, ZF-UZ-VAC 2001 vaksinasidan favqulodda vaziyatlarda foydalanishga ruxsat berish masalasi ham muhokama qilingan.

Agar maxsus komissiya bunga ruxsat bersa, Xitoy vaksinasi hamkor sifatida O‘zbekistonga imtiyozli narxlarda va yetarli quvvatlarda yetkazib beriladi. Bu haqda Respublika maxsus komissiyasining navbatdagi yig‘ilishida ishtirok etgan Oliy Majlis Qonunchilik palatasi deputati Doniyor G‘aniyev ma’lum qilgandi.

Uning aytishicha, maxsus komissiya raisi Xitoy kompaniyasi mahalliy farmatsevtika kompaniyalar bilan hamkorlikda ZF-UZ-2001 vaksinasini 2021-yilda 300 million donagacha ishlab chiqish quvvatiga egaligi hamda O‘zbekiston aholisi soni va hukumat talablari asosida yetarli miqdorda vaksina dozalarini yetkazib berishi mumkinligini bildirgan. Bu 2021-yil oxirigacha mamlakat aholisini ommaviy ravishda emlash imkoniyatini yaratadi.

Shu maqsadda koronavirus infeksiyasiga qarshi ommaviy emlash tadbirlarini tashkillashtirish borasida ko‘rilayotgan choralar, ZF-UZ-VAC 2001 vaksinasidan 1 million doza xarid qilish va mamlakatimiz aholisini ixtiyoriy ravishda ommaviy emlash tadbirlariga yo‘naltirish masalasini Oliy Majlis Qonunchilik palatasiga muhokamaga kiritish bo‘yicha respublika maxsus komissiyasining qarori qabul qilingan.

Shuningdek, Xalqaro Vaksinalar Ittifoqi (GAVI) tomonidan O‘zbekistonga 2,5 millionga yaqin AstraZeneca vaksinalarining bepul yetkazib berilishi bo‘yicha muzokaralar olib borilmoqda. Muzokaralar yakuniga qarab ushbu vaksinalarning dastlabki 800 ming donasi 2021-yilning mart oylarida O‘zbekistonga keltirilishi kutilmoqda.

Eslatib o‘tamiz, O‘zbekistonda koronavirusga qarshi emlash mart oyining birinchi yarmida boshlanishi ma’lum qilingan. Bunda birinchi navbatda koronavirus yuqish xavfi darajasi yuqori bo‘lgan shaxslar emlanadi va u faqatgina ixtiyoriylik tamoyili asosida amalga oshiriladi. O‘zbekistonda koronavirusga qarshi kurashish tadbirlari va vaksina uchun 3 trillion so‘m ajratish rejalashtirilgan. Ijtimoiy himoyaga muhtoj, yoshi katta va aholining boshqa zaif qatlamlari vakillari koronavirusga qarshi bepul emlanadi.

Maxsus komissiya qaroriga ko‘ra, O‘zbekistonda Rossiyaning Gamaleya ilmiy-tadqiqot markazi tomonidan ishlab chiqilgan “Sputnik V” vaksinasini qo‘llashga ruxsat berildi.

“Gazeta.uz”ning Korxonalar va tashkilotlarning yagona davlat reyestri ma’lumotlariga tayanib yozishicha, Jurabek Laboratories 1996-yil 12-avgustda ro‘yxatdan o‘tgan va farmatsevtika mahsulotlari ishlab chiqarish bilan shug‘ullanadi.

Rahbar sifatida Munira Kariyeva, ta’sischi sifatida — “Jurabek” xususiy korxonasi (67 foiz) va BAAning Bravo Medical Equipment Trading Establishment (33 foiz) ko‘rsatilgan.

Kompaniya saytida Jurabek Laboratories bosh direktori Sardor Kariyev ekanligi ko‘rsatilgan. U 2019-yildan buyon Sog‘liqni saqlash vazirligi huzuridagi Farmatsevtika sanoatini rivojlantirish agentligi direktori hisoblanadi. Jurabek Laboratories’ga 2005—2019-yillarda bosh direktor bo‘lgan.