O‘zbekistonda daraxt va butalarni kesishga o‘rnatilgan moratoriy muddati 2021-yil oxirigacha uzaytirilganiga qaramay, Qarshidagi istirohat bog‘ida ko‘p yillik daraxtlar kesilgani aniqlandi.
Qashqadaryo viloyat Ekologiya va atrof-muhitni muhofaza qilish boshqarmasi inspektorlari tomonidan 15-mart kuni soat 23:00 lar atrofida Qarshi shahar Alisher Navoiy nomidagi istirohat bog‘i ichidagi “Nuroniylar maskani”da Qarshi shahar hokimligi huzuridagi Obodonlashtirish boshqarmasi bir guruh xodimlari ko‘p yillik har xil turdagi daraxtlarni motoarra yordamida kesib, traktor tirkamalariga ortayotgani aniqlangan.
Holat yuzasidan huquqbuzarlarga tushuntirish ishlari olib borilgan va qonuniy to‘xtamga kelgunga qadar motoarralar olib qo‘yilgan.
Ammo tushuntirish ishlariga qaramay, 22-mart kuni tungi soat 00:10 lar atrofida Qarshi shahar hokimligi huzuridagi Obodonlashtirish boshqarmasi bir guruh xodimlari Qarshi shahar hokimi o‘rinbosarining nazorati ostida ushbu hududdagi qolgan ko‘p yillik har xil turdagi daraxtlarni motoarra yordamida kesayotgani aniqlangan.
Inspektorlar tomonidan yuqorida keltirilgan ikkala holat atroflicha o‘rganilib, moratoriy davrida ham saqlab qolishni imkoni bo‘lmagan 14 dona ko‘p yillik daraxt diametrlari o‘lchanganda tabiatga keltirilgan zarar 58 milllion 677 ming 500 so‘m ekanligi aniqlangan.
Qayd etilishicha, har ikki aniqlangan holat bo‘yicha vakolat doirasida tegishli hujjatlar rasmiylashtirilmoqda.
Eslatib o‘tamiz, Shavkat Mirziyoyevning 3-fevraldagi farmoni bilan O‘zbekistonda daraxt va butalarni kesishga o‘rnatilgan moratoriy muddati 2021-yil oxirigacha uzaytirilgan. Shuningdek, daraxtlarni noqonuniy kesganlik uchun jarima miqdori ikki baravarga oshirilgan.
Avvalroq Qarshi tumanida 71 ta mevali daraxt o‘zboshimchalik bilan qo‘porib tashlanishi oqibatida tabiatga salkam 28 million so‘m zarar yetkazilgani haqida xabar berilgan edi.
Izoh (0)