Sog‘liqni asrash uchun birinchi qadam: Garderobda qoldirib bo‘lmaydigan xavfli buyumlar (foto)

Garderobdan o‘rin olgan ba’zi buyumlar foydali ko‘rinsa-da, aslida ularning zararli tomonlari ham bor. Ular qaysidir ma’noda moda qurboniga aylanishga yordam berishi ham mumkin.

O‘ta tor jinsi shimlar

Ayollarning eng sevimli kiyimi, albatta, tor jinsi shimlardir. Kimdir uni semirib ketmaslik uchun kiysa, yana kimdir qulayligi uchun kiyadi. Bugunda har qanday garderobdan topish mumkin bo‘lgan tor jinsi shimlar sog‘liq uchun biroz xavf tug‘dirishi haqida ham o‘ylab ko‘rish lozim. Badanga yopishib turuvchi jinsi shimlar tanada qon aylanishiga xalaqit beradi va natijada qon-tomir kasalliklari yuzaga keladi.

Baland poshnali tuflilar

Churra, barmoqlar qiyshayishi, bel va oyoqdagi og‘riqlar qayerdan paydo bo‘lishi mumkin? Albatta, bu doimiy ravishda o‘ta baland poshna tufli kiyish natijasidir. Shuningdek, baland poshnada kuni bilan harakatlanish vaqt o‘tib, oyoqda tomirlarning bo‘rtib chiqishiga ham sabab bo‘ladi.

Shippaklar

Aynan shunday ko‘rinishdagi shippaklar tufayli oyoq va barmoqlar zo‘riqadi. Barmoqlar doimiy harakatda bo‘lib, shippaklarning chiqib ketmasligi uchun muskullarni taranglashtiradi. Bu esa boldir va to‘piqlarda og‘riqlarni paydo qiladi. Shuning uchun uzoq vaqt kiyish tavsiya etilmagan bu kabi shippaklarni plyaj yoki dam olish maskanlarda kiygan ma’qul.

Sifatsiz zargarlik buyumlari

Sifatsiz hamda arzon zargarlik buyumlari qisqa vaqt ichida o‘z ko‘rinishini yo‘qotibgina qolmay, balki uning egasiga ham bir qancha zarar yetkazadi. Masalan, terida allergiya, tirnash, qizarish kabi holatlarga sabab bo‘ladi. Shuning uchun salomatlikni ortiqcha xatarga qo‘ymay, iloji boricha sifatsiz buyumlardan cheklanishga harakat qilish lozim.

Kichik o‘lchamdagi poyabzal

Chiroyli ammo o‘lchami kichikroq bo‘lgan poyabzallarni kiyadiganlar uchun qat’iy ogohlantiruv! Bu orqali tashqi ko‘rinishni go‘zallashtirish mumkindir, ammo barmoq suyaklari va oyoqqa batamom zarba beriladi. Poyabzal ichida siqilib qolgan oyoqda qon aylanishi sekinlashadi, suyaklar qiyshayishga moyillashadi va natijada bir qancha muammolar kelib chiqadi.

 Yassi oyoq kiyim

Yassi oyoq kiyimlar qancha yengil va qulay bo‘lmasin, zararli xususiyatlarga ham ega. Ushbu poyabzal orqali bel va oyoqda og‘riq kuzatiladi. Shuningdek, qomatni tik tutishning darajasi kamayadi hamda oyoqning tag qismi ham yassilanadi.