O‘zbekistonda 17-mart holatiga ko‘ra, koronavirus bilan kasallanganlar soni 80 971 kishiga yetdi. Bu haqda Sog‘liqni saqlash vazirligi matbuot xizmati xabar berdi.
O‘tgan bir sutka ichida mamlakatda yana 113 kishida COVID-19 tasdiqlangan, ularning 93 nafari — Toshkent shahrida.
Yangi kasallanish holatlarining:
- 6 nafari Buxoro viloyatida,
- 1 nafari Jizzax viloyatida,
- 1 nafari Samarqand viloyatida,
- 2 nafari Surxondaryo viloyatida,
- 2 nafari Xorazm viloyatida,
- 8 nafari Toshkent viloyatida
Toshkent viloyatida 7 nafar, Toshkent shahrida 76 nafar bemor tuzalib, kasallikdan sog‘ayganlar jami 79533 nafarga yetdi va sog‘ayish ko‘rsatkichi 99 foizni tashkil qilmoqda.
Vazirlik ayni paytda tibbiyot muassasalarida davolanayotgan 816 nafar bemordan 141 nafari og‘ir, 23 nafari esa o‘ta og‘ir ahvolda ekanini qayd etgan.
Eslatib o‘tamiz, 14-mart kuni O‘zbekistonda dekabrdan beri birinchi marta bir kunda 100 dan ortiq odamda koronavirus aniqlanib, shundan 93 tasi Toshkent shahrida qayd etilgandi.
Poytaxtda koronavirusga chalinish holatlari, asosan, o‘quvchilar, talabalar va tashkilot xodimlari orasida ko‘paygan. Xususan, Toshkentdagi 77 ta maktabda o‘quvchilar orasida koronavirus infeksiyasi aniqlangan, 117-sonli bog‘chada ikki nafar tarbiyachi va bolalarda koronavirus aniqlangani sabab mazkur bog‘cha vaqtincha yopildi.
Avvalroq Toshkent shahridagi taksi va qurilish sohasida karantin choralari kuchaytirilishi, poytaxt hokimligi va uning tizimidagi barcha tuzilmalarda turli yig‘ilishlarni o‘tkazish taqiqlangani haqida xabar berilgan edi. Koronavirus keng tarqalishining oldini olish maqsadida Toshkentdagi ayrim maktablarda o‘qish bosqichma-bosqich masofaviy shaklga o‘tkazilmoqda, bozor va savdo markazlarida karantin talablari kuchaytirildi.
Izoh (0)