Ўзбекистонда 17 март ҳолатига кўра, коронавирус билан касалланганлар сони 80 971 кишига етди. Бу ҳақда Соғлиқни сақлаш вазирлиги матбуот хизмати хабар берди.
Ўтган бир сутка ичида мамлакатда яна 113 кишида COVID-19 тасдиқланган, уларнинг 93 нафари — Тошкент шаҳрида.
Янги касалланиш ҳолатларининг:
- 6 нафари Бухоро вилоятида,
- 1 нафари Жиззах вилоятида,
- 1 нафари Самарқанд вилоятида,
- 2 нафари Сурхондарё вилоятида,
- 2 нафари Хоразм вилоятида,
- 8 нафари Тошкент вилоятида
Тошкент вилоятида 7 нафар, Тошкент шаҳрида 76 нафар бемор тузалиб, касалликдан соғайганлар жами 79533 нафарга етди ва соғайиш кўрсаткичи 99 фоизни ташкил қилмоқда.
Вазирлик айни пайтда тиббиёт муассасаларида даволанаётган 816 нафар бемордан 141 нафари оғир, 23 нафари эса ўта оғир аҳволда эканини қайд этган.
Эслатиб ўтамиз, 14 март куни Ўзбекистонда декабрдан бери биринчи марта бир кунда 100 дан ортиқ одамда коронавирус аниқланиб, шундан 93 таси Тошкент шаҳрида қайд этилганди.
Пойтахтда коронавирусга чалиниш ҳолатлари, асосан, ўқувчилар, талабалар ва ташкилот ходимлари орасида кўпайган. Хусусан, Тошкентдаги 77 та мактабда ўқувчилар орасида коронавирус инфекцияси аниқланган, 117-сонли боғчада икки нафар тарбиячи ва болаларда коронавирус аниқлангани сабаб мазкур боғча вақтинча ёпилди.
Аввалроқ Тошкент шаҳридаги такси ва қурилиш соҳасида карантин чоралари кучайтирилиши, пойтахт ҳокимлиги ва унинг тизимидаги барча тузилмаларда турли йиғилишларни ўтказиш тақиқлангани ҳақида хабар берилган эди. Коронавирус кенг тарқалишининг олдини олиш мақсадида Тошкентдаги айрим мактабларда ўқиш босқичма-босқич масофавий шаклга ўтказилмоқда, бозор ва савдо марказларида карантин талаблари кучайтирилди.
Изоҳ (0)