O‘zbekistonda dekabrdan beri birinchi marta bir kunda 100 dan ortiq odamda koronavirus aniqlandi
O‘zbekistonda 14-mart kuni koronavirus infeksiyasini yuqtirib olish bilan bog‘liq 111 ta yangi holat qayd etildi, deya xabar bermoqda Sog‘liqni saqlash vazirligi.
Yangi kasallanish holatlarining
- 4 tasi Andijon viloyatida,
- 1 tasi Buxoro viloyatida,
- 1 tasi Surxondaryo viloyatida,
- 12 tasi Toshkent viloyatida,
- 93 tasi Toshkent shahrida
Qayd etish joiz, Toshkent shahrida kasallanish ko‘rsatkichlari so‘nggi bir hafta ichida sezilarli oshgan. Xususan, 9-mart kuni poytaxtda 11 ta yangi holat aniqlangan bo‘lsa, 10-mart kuni 71 ta, 12-mart kuni 70 ta va 13-mart kuni 77 ta yangi holat qayd etilgan.
Umuman olganda, Toshkent shahri ko‘rsatkichining keskin oshishi inobatga olinmasa, rasmiy statistika bo‘yicha 2021-yilning mart oyida koronavirus bilan bog‘liq vaziyat O‘zbekiston uchun yanvar yoki fevralga nisbatan yengilroq kechayotgan edi.
Jumladan, yanvar va fevral oyining dastlabki 14 kunida O‘zbekistonning Toshkent shahridan boshqa hududlarida mos ravishda 492 ta va 314 ta holat aniqlangan bo‘lsa, 1—14 mart kunlari faqat 129 ta kasallanish qayd etilgan edi.
E’tiborga molik tomoni, rasmiy statistika bo‘yicha Navoiy viloyatida 7-fevraldan beri, Qashqadaryo viloyatida 12-fevraldan beri, Namangan viloyatida 19-fevraldan beri, Sirdaryo viloyatida 27-fevraldan beri birorta kasallanish holati qayd etilmagan.
Ma’lumot uchun, O‘zbekistonda koronavirusga chalingan bemorlarning bir kunlik soni so‘nggi bor 2020-yilning 24-dekabr kuni 100 kishidan oshgan edi. O‘shanda SSV matbuot xizmati butun O‘zbekiston bo‘ylab 112 kishida kasallik tasdiqlanganini ma’lum qilgan.
