16-mart kuni Oliy sudda bo‘lib o‘tgan matbuot anjumanida Oliy sud sudyasi Abduvohid Qosimov sudyalarning oylik maoshi to‘g‘risidagi savollarga javob berdi, deb yozadi Repost.
“O‘zbekistonda 1300 dan ortiq sudya bor. Maoshimiz qancha ekani hech kimga sir emas, biroq u bitta oilani boqishga yetadi. O‘ylashimizcha, buni ochiqlash shart emas”, — deydi Qosimov.
U maoshining miqdorini ochiqlashni istamagani, jamiyatda yuzaga kelishi mumkin bo‘lgan tanqidiy muhokamalarning oldini olish xohishi bilan izohlagan.
“ ‘Shuncha oylik olgani uchun aftidan, korrupsiyaga yo‘l qo‘ygan’ yoki ‘shuncha maosh olishiga qaramay, nimaga baribir korrupsiya bilan shug‘ullanmoqda’ qabilidagi tanqidiy fikrlarning oldini olish nuqtayi nazaridan sudyalar maoshi ochiqlanmasligi kerak deb hisoblaymiz. Xudoga shukur maoshimiz oilamizni boqishga yetyapti”, — deydi Oliy sud sudyasi.
Eslatib o‘tamiz, 2019-yilning dekabrida Oliy sud sudyasi Ibrohim Tojiyev Oliy sudda faoliyat yuritayotgan sudyalarning o‘rtacha oylik ish haqi 5 million so‘mdan 8 million so‘mgacha yetishini ma’lum qilgandi.
2020-yilning iyulida esa Oliy sudi raisi o‘rinbosari Xolmo‘min Yodgorov BMTning maxsus ma’ruzachisi Diyego Garsiya-Sayanning O‘zbekiston sudyalari mustaqil emasligi haqidagi fikrlariga munosabat bildirib, olib borilgan qisqa vaqtdagi islohotlar natijasida sudyalarga to‘liq sharoit – yuqori oylik, ish sharoiti, xizmat avtomashinalari yaratilganini aytgandi. “Eng asosiy mezonlardan biri – besh yil yaxshi ishlasa 10 yil, 10 yillik muddatdan ham o‘tganidan keyin cheklanmagan muddatga ishga tayinlagandan keyin, yuqori oylik berilganidan keyin, birorta idora sudni ishiga aralashmasin, deb ma’muriy va jinoiy javobgarlik belgilab qo‘yilgandan keyin, bilmadim, qaysi ma’noda sudyalarning hali mustaqil emasligi aytilgan”, — degan edi u.
Izoh (0)