Toshkentda koronavirusga chalinish holatlari asosan o‘quvchilar, talabalar va tashkilot xodimlari orasida ko‘paygani ma’lum qilindi

Toshkentda o‘quvchilar, talabalar va tashkilot xodimlarida virus chiqmoqda. Joylardagi nazorat tadbirlari qayta joriy etildi. Bu haqda Sanitariya-epidemiologik osoyishtalik va jamoat salomatligi markazi Toshkent shahar boshqarmasi boshlig‘i Malika Qudratxo‘jayeva ma’lum qildi.

“Tekshiruvlar natijasi shuni ko‘rsatdiki, aholi orasida koronavirusga chalinish holatlari ko‘paygan. Ayniqsa, maktab o‘quvchilari orasida, talabalar orasida, tashkilot, muassasalar xodimlari orasida ko‘paygani kuzatildi.

Bu esa aholi tomonidan, tashkilot va muassasalar tomonidan karantin choralariga amal qilinmayotganini ko‘rsatadi. Ya’ni, o‘lchov vositalaridan foydalanmaslik, kasal bo‘lishiga qaramasdan, ish va o‘qishga borib, boshqalarni xavfga qo‘yish holatlari kuzatilmoqda.

Aholi o‘rtasida kasallik tarqalishining oldini olish maqsadida qator tashkilotlar bilan birgalikda tadbirlar o‘tkazilishi boshlandi.

Shu kunlarda Milliy gvardiya, Ichki ishlar boshqarmasi, Sanitariya-epidemiologiya xizmati xodimlaridan iborat guruhlar tuzilib, bozorlarda, umumiy ovqatlanish muassasalarida, tashkilot va muassasalarda karantin talablariga rioya qilinishi yuzasidan nazorat olib borilishi yana yo‘lga qo‘yildi”, – dedi boshqarma boshlig‘i Malika Qudratxo‘jayeva.

Avvalroq 14-mart kuni O‘zbekistonda koronavirus infeksiyasini yuqtirib olish bilan bog‘liq 111 ta yangi holat aniqlangani, bu 2020-yil 24-dekabrdan (112 ta holat) beri kuzatilgan eng yomon antirekord ekani haqida xabar berilgan edi.

Ushbu 111 ta holatning 93 tasi Toshkent shahrida aniqlangan. Umuman olganda, Toshkentda so‘nggi bir hafta ichida kasallanish holatlari soni keskin oshgan. Shu munosabat bilan shaharda karantin talablariga rioya qilinishi ustidan nazorat kuchaytirilishi ma’lum qilindi.