31-mart kuni Qozog‘istonning Turkiston shahrida Turkiy tilli davlatlar hamkorlik kengashining norasmiy sammiti bo‘lib o‘tadi, deb xabar beradi “Dunyo” agentligi.
Sammit Qozog‘istonning birinchi prezidenti Nursulton Nazarboyev tashabbusi bilan chaqirilmoqda. Unda Turkiy tilli davlatlar hamkorlik kengashiga a’zo-davlatlarning barcha rahbarlari va tashkilot kuzatuvchisi maqomida bo‘lgan Vengriyaning bosh vaziri ishtirok etishini tasdiqlagan.
Sammit yakuni bo‘yicha Turkiston shahrini Turk olamining ma’naviy poytaxti deya e’lon qilish borasidagi deklaratsiyalarni imzolash rejalashtirilgan.
Ma’lumot uchun, Turkiy tilli davlatlar hamkorlik kengashi 2009-yil 3-oktabrda Ozarbayjonning Naxichevan shahrida tuzilgan bo‘lib, dastlab unga Turkiya, Ozarbayjon, Qozog‘iston va Qirg‘iziston a’zo edi. Shavkat Mirziyoyev 2018-yil 3-sentabr kuni Qirg‘izistonning Cho‘lponota shahrida bo‘lib o‘tgan sammitda faxriy mehmon sifatida ishtirok etgan. 2019-yilning oktabrida esa O‘zbekiston Turkiy tilli davlatlar hamkorlik kengashi sammitida ilk bor to‘la huquqli a’zo sifatida ishtirok etgandi.
Avvalroq Shavkat Mirziyoyev Turkiya tashqi ishlar vaziri Mavlud Chavusho‘g‘li bilan Turkiy tilli davlatlar hamkorlik kengashi doirasidagi hamkorlik masalalari yuzasidan fikr almashgan edi.
Izoh (0)