Suriya prezidenti Bashar Asad va uning rafiqasi Asma al-Asadda koronavirus infeksiyasi aniqlandi. Bu haqda prezident idorasi Facebook orqali ma’lum qildi, deb yozadi “RBK”.
“Ayni paytda ularning ahvoli yaxshi va o‘zlarini izolyatsiyaga olishgan”, — deya qo‘shimcha qilinadi xabarda. Yaqin ikki-uch hafta ichida Asad va uning rafiqasi uyidan ishlaydi.
“Prezident Asad va Asma xonim suriyaliklarga va dunyodagi barcha xalqlarga ushbu virusdan xavfsizlik va farovonlik tilaydi hamda suriyaliklarni iloji boricha ehtiyotkorlik va profilaktika choralarini ko‘rishda davom ettirishga chaqiradi”, — deyiladi bayonotda.
Ayni paytda Bashar Asad 55 yoshda, uning rafiqasi esa 45 yoshda.
Malumot uchun, Suriyada 22-fevral kuni Rossiyaning koronavirusga qarshi “Sputnik V” vaksinasini qo‘llash ma’qullangan.
Jons Hopkins universiteti ma’lumotlariga ko‘ra, pandemiya boshidan beri Suriyada 15,9 ming nafar kishida koronavirus aniqlangan, ming kishi kasallikdan vafot etgan.
Avvalroq Portugaliya prezidenti Marselu Rebelu di Sozaning koronavirus infeksiyasiga topshirgan testi musbat natija ko‘rsatgani haqida xabar berilgandi. Shuningdek, Armaniston prezidenti Armen Sarkisyan oilasi bilan Yangi yil ta’tilini o‘tkazish paytida London shahrida koronavirus yuqtirib olgan. Prezident matbuot xizmati unda kasallik og‘ir kechganini ma’lum qilgan.
Bundan tashqari, Braziliya vitse-prezidenti, Fransiya prezidenti Emmanuel Makron, Shvetsiya shahzodasi Karl Filipp va malika Sofiyada hamda Ukraina prezidenti Vladimir Zelenskiyda koronavirus aniqlangan.
Eslatib o‘tamiz, AQShning sobiq prezidenti Donald Trampda 1-oktabr kuni koronavirus aniqlangandi. AQSh prezidenti bir necha kun kasalxonada davolangan va u yerdan 5-oktabr kuni chiqqan. Noyabr oyining oxirida esa Trampning o‘g‘li kichik Donald Tramp koronavirusga chalingan.
Izoh (0)