Fransiyaning shimoli-g‘arbida ichida fransiyalik milliarder va siyosatchi Olivye Dasso bo‘lgan vertolyot qulab tushdi. Natijada Dasso va uchuvchi halok bo‘ldi. Bu haqda Figaro nashriga tayanib “RBK” xabar berdi.
2020-yil Dasso Forbes jurnalining milliarderlar reytingida 4,7 milliard dollar bilan 361-o‘rinni egallagan.
Aviahalokat Dovil shahri yaqinida, Kalvados departamentida mahalliy vaqt bilan 18:00 da (Toshkent vaqti bilan 22:00) sodir bo‘ldi. Bu ma’lumotlar Lizyo kommunasi prokurori Delfin Menniel tomonidan tasdiqlandi. AS350 Squirrel vertolyoti xususiy maydonchadan uchib ketayotganda halokatga uchradi.
Havo transporti jandarmeriyasi qasddan qilinmagan qotillik bo‘yicha tergov boshladi.
Tadbirkor va Fransiya Milliy majlisi deputatining vafoti munosabati bilan davlat rahbari Emmanuel Makron hamdardlik bildirdi. “Olivye Dasso Fransiyani sevardi. Hayoti davomida vataniga xizmat qilishdan va uni qadrlashdan to‘xtamadi. Uning kutilmagan vafoti katta yo‘qotish bo‘ldi” — deb yozdi prezident Twitter sahifasida.
Dasso 69 yoshda edi. U fransuz aviatsiya muhandisi, biznes va harbiy samolyotlar, kosmik sun’iy yo‘ldoshlar ishlab chiqaradigan va samolyotlarga xizmat ko‘rsatadigan Dassault Aviation oilaviy korporatsiyasining asoschisi Marsel Dassoning nabirasi edi. Shuningdek, korporatsiya Figaro gazetasini ham yuritadi.
Bobosining o‘limidan keyin 1986-yilda Olivye Dassoning otasi Serj Dasso o‘g‘lini Europe Falcon Service sho‘ba korxonasining direktor o‘rinbosari etib tayinlaydi. Keyinchalik Dassault Aviation kompaniyasining fuqarolik aviatsiyasiga ixtisoslashgan bo‘limida strategik direktor bo‘lib ishlaydi. Olivye Dasso professional uchuvchi bo‘lib, tezlik bo‘yicha bir nechta jahon rekordini o‘rnatgan.
Siyosiy karyerasini 1977-yilda Parij shahar kengashiga saylanganidan keyin boshlagan. U birinchi marta 2002-yilda Milliy majlisga (Fransiya parlamentining quyi palatasi) saylangan, undan keyin uch marta qayta saylandi. “Respublikachilar” konservativ partiyasi a’zosi edi. Xususan, Dasso o‘lim jazosining qayta tiklanishini qo‘llab-quvvatlagan, bir jinslilar nikohini qonuniylashtirishga qarshi chiqqan.
Mavzuga doir:
- Dunyoning sobiq eng badavlat kishisi Karlos Slim koronavirus bilan kasalxonaga yotqizildi
- Xitoyda milliarder Lin Si zaharlanishdan vafot etdi. Politsiya uning hamkasbini qo‘lga oldi
- Eronda mamlakatning yetakchi yadro fizigi Muhsin Faxrizoda o‘ldirildi. U “Eron bombasi otasi” nomi bilan shuhrat qozongandi
- AQSh Eronning eng nufuzli generalini o‘ldirib qo‘ydi. Endi nima bo‘ladi?
Izoh (0)