Ekvatorial Gvineyaning eng yirik shahri Batadagi harbiy bazada sodir bo‘lgan portlashlar oqibatida kamida 20 kishi halok bo‘ldi va 400 dan ortiq odam jarohat oldi. Bu haqda mahalliy AhoraEG nashriga tayanib, “RBK” xabar berdi.
Birinchi portlash 7-mart kuni mahalliy vaqt bilan soat 13:45 da (Toshkent vaqti bilan 17:45 da) sodir bo‘lgan. Shundan so‘ng, bir yarim soat ichida kamida yana uchta portlash, soat 17:44 da esa beshinchi kuchli portlash, so‘ngra yana bir nechta kichik portlashlar yuz bergan.
Uchinchi portlashdan so‘ng, voqea joyiga favqulodda xizmat xodimlari kelishni boshlagan, ular yaradorlarni va vayronalar ostida qolgan odamlarni olib chiqishgan. Nashrning yozishicha, jarohat olganlar soni 420 kishiga yetgan, 20 kishi vafot etgan.
Ekvatorial Gvineya tashqi ishlar vaziri Simeon Angue Batadagi vaziyatni halokatli deb atadi va diplomatik kanallar orqali xalqaro yordam so‘radi.
Reuters xabariga ko‘ra, portlash sodir bo‘lgan hududda barcha binolarning tomlari uchib ketgan va aksariyatining devorlari qulagan. Ekvatorial Gvineyadagi Ispaniya elchixonasi (Markaziy Afrika mamlakati ilgari Ispaniyaning mustamlakasi bo‘lgan) o‘z fuqarolaridan uyda qolishni so‘ragan.
Mamlakat prezidenti Teodoro Obiang Ngemaning rasmiy xabarida kamida 15 kishi halok bo‘lgani va 500 ga yaqin odam jarohat olgani aytilgan. Ngemaning ta’kidlashicha, Nkoatama harbiy bazasidagi portlashlar xodimlarning beparvoligi tufayli sodir bo‘lgan.“Bata shahri beparvolik va ehtiyotsizlik oqibatida sodir bo‘lgan fojianing qurboniga aylandi. Bu o‘q-dorilar, dinamit va boshqa portlovchi moddalarni saqlash uchun mas’ul bo‘linma xodimlarining aybidir. Qo‘shni fermer xo‘jaliklarida paydo bo‘lgan yong‘in harbiy bazaga tutashgan va natijada portlash kelib chiqqan”, — dedi prezident.
Respublika rahbari voqeani chuqur o‘rganib chiqishni va zararni baholashni buyurganini aytdi. U shahar aholisini xotirjam bo‘lishga chaqirdi, shuningdek yordam so‘rab xalqaro hamjamiyatga murojaat qildi.
Avvalroq Afg‘oniston va Eron chegarasida joylashgan bojxona postida 500 dan ortiq transport vositasi yonib ketgani haqida xabar berilgandi. Qayd etilishicha, benzin tashuvchi avtomobil (“benzovoz”)ning portlashi yong‘inni keltirib chiqargan bo‘lishi mumkin.
Mavzuga doir:
Izoh (0)