O‘zbekistonda daraxt va butalarni kesishga o‘rnatilgan moratoriy muddati 2021-yil oxirigacha uzaytirilganiga qaramay, Samarqandda chinor daraxti kesilgani haqida xabar berilgandi. Holat yuzasidan Davlat ekologiya qo‘mitasi munosabat bildirdi.
Qayd etilishicha, Samarqand tumanida joylashgan “Sulfakautak” mahallasida Sulfakautak va X.G‘iyosov ko‘chalari kesishmasida 2021-yil 7-fevral kuni 1 tup chinor daraxtining kesilganligi to‘g‘risidagi xabar Samarqand viloyati ekologiya va atrof muhitni muhofaza qilish boshqarmasi Samarqand tuman inspektorlari tomonidan joyiga chiqib o‘rganildi.
O‘rganish davomida haqiqatan ham bayon etilgan manzilda 1 tup chinor daraxti kesilib, tagidan tomiri bilan kavlab olingan. Mazkur hududdan kesib o‘tgan ko‘chada amalga oshirilayotgan kengaytirish va rekonstruksiya ishlari olib borilayotganidan foydalanib, fuqaro X.A. o‘z ehtiyojlari uchun chinor daraxtini noqonuniy kesganligi aniqlandi.
Mazkur holat yuzasidan qonunbuzar fuqaroga nisbatan Ma’muriy javobgarlik to‘g‘risidagi kodeksning 79-moddasi 1-qismiga (daraxtlar, butalar, boshqa o‘rmon o‘simliklari va nihollarni g‘ayriqonuniy ravishda kesish, shikastlantirish yoki yo‘q qilish) binoan bayonnoma rasmiylashtirilib, bazaviy hisoblash miqdorining 5 barobari, ya’ni 1 million 225 ming so‘m jarima va tabiatga yetkazilgan zarar uchun 55 million 125 ming so‘m miqdorida zarar hisoblandi.
Bundan avval Sergelida daraxtlarning ekskavator bilan qo‘porib tashlanishi oqibatida o‘simlik dunyosiga 151 million so‘mlik zarar yetkazilgani, O‘zbekistonda noqonuniy kesilgan har tup daraxt uchun 100 tup ko‘chat ekishni majburiy etish taklif qilingani hamda Farg‘onada 2 tup chinor va bir tup tolni noqonuniy kestirgan bog‘cha mudirasiga 15 million so‘m jarima yozilgani haqida xabar berilgandi.
Izoh (0)