Andijonda faoliyat yuritayotgan ma’muriy sudlar 2018—2020-yillarda hokimlar tomonidan chiqarilgan qarorlarning 243 tasini bekor qilgan. Bu haqda viloyat ma’muriy sudi raisi Otabek Mirzamahmudov ma’lum qildi, deya xabar berdi “Daryo” muxbiri.
Ta’kidlanishicha, Andijon viloyat sudida OAV vakillari uchun “Sud muhokamasi oshkoraligi va sudlar faoliyatiga doir axborotlar olish huquqini ta’minlash” mavzusida matbuot anjumani o‘tkazilgan. Unda sud muhokamasi oshkoraligini ta’minlash borasida olib borilayotgan ishlari xususida so‘z borgan.
Viloyat ma’muriy sudi raisi Otabek Mirzamahmudovning aytishicha, so‘nggi uch yil davomida hokimlar qarorini haqiqiy emas deb topish bilan bog‘liq 606 ta ish ko‘rib chiqilgan. Shundan 243 ta ish hokim qarori haqiqiy emas topish bilan yakunlangan.
“So‘nggi yillarda hokimlar tomonidan qabul qilinayotgan qarorlarning sudlar tomonidan bekor qilinayotgani bundan buyon ularning qaror qabul qilishida ochiqlikni ta’minlash zarurligini taqozo etmoqda. Shuning uchun mahalliy davlat hokimiyati idoralarining qarorlarini hisobga qo‘yish va e’lon qilish bo‘yicha elektron axborot tizimi joriy etilishi fuqarolarning buzilgan huquqlari himoyalanishi hisoblanadi. Jumladan, Andijon viloyat ma’muriy sudlari tomonidan ham 2020-yil davomida hokimlarning 216 ta qarorini haqiqiy emas deb topish bilan bog‘liq ommaviy huquqiy munosabatlardan kelib chiqadigan ishlar ko‘rib chiqilgan bo‘lib, shundan 99 tasi qanoatlantirilgan. Shuningdek, 95 tasi rad etilgan, 10 tasi ish yuritishdan tugatilgan, 12 tasi esa ko‘rmasdan qoldirilgan. So‘nggi uch yillik statistika ma’lumotini ko‘radigan bo‘lsak, 2018—2020-yillar davomida hokimlar tomonidan qabul qilingan 243 ta qaror haqiqiy emas, deb topilgan. Bu esa fuqarolarning buzilgan huquqlari sud tomonidan samarali tarzda himoyalanib kelayotganidan dalolat beradi”, — dedi viloyat ma’muriy sudi raisi Otabek Mirzamahmudov.
Izoh (0)