O‘zbekistonda har yili 1700—1800 ayol bachadon bo‘yni saratoniga chalinadi, ularning 42 foizdan ortig‘i vafot etadi. Bu haqda 9-fevral, seshanba kuni AOKAda tashkil etilgan matbuot anjumanida Sanitariya-epidemiologik osoyishtalik va jamoat salomatligi xizmati rahbar o‘rinbosari Botir Qurbonov ma’lum qildi.
Uning aytishicha, O‘zbekistonda bachadon bo‘yni saratoni barcha yoshdagi ayollar o‘rtasida ko‘krak bezi saratonidan keyingi o‘rinda turadigan va eng keng tarqalgan saraton xastaligi hisoblanadi.
Kasalliklardan o‘lim ko‘rsatkichi bo‘yicha esa bachadon bo‘yni saratoni barcha yoshdagi ayollar o‘rtasida ko‘krak bezi va oshqozon saratoni tufayli o‘limdan keyin uchinchi o‘rinda va tug‘ish yoshidagi ayollar (15—44 yosh) orasida bachadon sartonidan o‘lim ko‘rsatkichi bo‘yicha ikkinchi o‘rinda turadi.
“Ushbu o‘limlarning aksariyati — tashxisni kech qo‘yish natijasida ro‘y beradi. Bachadon bo‘yni saratoni kasalligini keltirib chiqaruvchi sabablarning asosiysi (98—99 foizi) odam papilloma virusi (OPV) hisoblanadi”, — degan Botir Qurbonov.
Izoh (0)