Ўзбекистонда дарахт ва буталарни кесишга ўрнатилган мораторий муддати 2021 йил охиригача узайтирилганига қарамай, Самарқандда чинор дарахти кесилгани ҳақида хабар берилганди. Ҳолат юзасидан Давлат экология қўмитаси муносабат билдирди.
Қайд этилишича, Самарқанд туманида жойлашган «Сулфакаутак» маҳалласида Сулфакаутак ва Х.Ғиёсов кўчалари кесишмасида 2021 йил 7 февраль куни 1 туп чинор дарахтининг кесилганлиги тўғрисидаги хабар Самарқанд вилояти экология ва атроф муҳитни муҳофаза қилиш бошқармаси Самарқанд туман инспекторлари томонидан жойига чиқиб ўрганилди.
Ўрганиш давомида ҳақиқатан ҳам баён этилган манзилда 1 туп чинор дарахти кесилиб, тагидан томири билан кавлаб олинган. Мазкур ҳудуддан кесиб ўтган кўчада амалга оширилаётган кенгайтириш ва реконструкция ишлари олиб борилаётганидан фойдаланиб, фуқаро Х.А. ўз эҳтиёжлари учун чинор дарахтини ноқонуний кесганлиги аниқланди.
Мазкур ҳолат юзасидан қонунбузар фуқарога нисбатан Маъмурий жавобгарлик тўғрисидаги кодекснинг 79-моддаси 1-қисмига (дарахтлар, буталар, бошқа ўрмон ўсимликлари ва ниҳолларни ғайриқонуний равишда кесиш, шикастлантириш ёки йўқ қилиш) биноан баённома расмийлаштирилиб, базавий ҳисоблаш миқдорининг 5 баробари, яъни 1 миллион 225 минг сўм жарима ва табиатга етказилган зарар учун 55 миллион 125 минг сўм миқдорида зарар ҳисобланди.
Бундан аввал Сергелида дарахтларнинг экскаватор билан қўпориб ташланиши оқибатида ўсимлик дунёсига 151 миллион сўмлик зарар етказилгани, Ўзбекистонда ноқонуний кесилган ҳар туп дарахт учун 100 туп кўчат экишни мажбурий этиш таклиф қилингани ҳамда Фарғонада 2 туп чинор ва бир туп толни ноқонуний кестирган боғча мудирасига 15 миллион сўм жарима ёзилгани ҳақида хабар берилганди.
Изоҳ (0)