Marg‘ilonda 17 yoshli fuqaroning qimmatbaho telefonini olib qo‘ygan 5 nafar 16 yoshli bolaga nisbatan jinoyat ishi qo‘zg‘atildi, deya xabar bermoqda Tergov departamenti.
Ma’lum qilinishicha, 2021-yilning 5-fevral kuni soat 13:30 larda noma’lum shaxslar Spark rusumli avtomashinasini Oltiariq tumani “Yangiturmush” MFY hududida boshqarib, yo‘l chetida tanish qizi bilan turgan voyaga yetmagan 17 yoshli Doniyorbek A.ni bir necha marotaba chaqirib, uni ushbu chaqiriqlarga qaramayotganini vaj qilib, unga nisbatan zo‘rlik ishlatgan.
Ular Doniyorbek A.ni avtomashinani oldiga olib kelib egnida bo‘lgan kamzulining chap cho‘ntagidagi narxi 4 100 000 so‘mlik Samsung A-31 rusumli telefon apparatini ochiqdan-ochiq talon-toroj qilib, hodisa joyidan yashiringan.
Olib borilgan tergovga qadar tekshiruv harakatlari natijasida mazkur jinoyatni voyaga yetmagan 16 yoshli Raxmatillo N., sinfdoshlari Husanboy T., Muhammadali M., Muhammadsodiq S., va Xayrullo T. bilan sodir etganligi aniqlangan.
Shuningdek, ular Marg‘ilon shahar Baraka ko‘chasida yashovchi fuqaro Bekzod A.ga tegishli bo‘lgan Spark rusumli avtomashinani 1 soatga 50 000 so‘m evaziga ijaraga olib, hech qanday tegishli hujjatlarsiz ushbu avtomashinani boshqarganliklari hamda fuqaro Doniyorbek A.ga tegishli bo‘lgan Samsung A-31 rusumli uyali telefon apparatini hujjatlari yonib ketganligini aytib Marg‘ilon shahrida yashovchi Sardor K.ga 1 500 000 so‘m evaziga sotib yuborgani ma’lum bo‘lgan.
Ta’kidlanishicha, Samsung A-31 rusumli telefon apparati Sardor K. dan ashyoviy dalil tariqasida rasmiylashtirilib olingan.
Mazkur holat yuzasidan voyaga yetmagan Raxmatillo N., Husanboy T., Muhammadali M., Muhammadsodiq S., va Xayrullo T.ga nisbatan Jinoyat kodeksining 166-moddasi 2-qismi “v” bandi (talonchilik) bilan jinoyat ishi qo‘zg‘atilgan.
Shuningdek, Spark rusumli avtomashinasini hech qanday tegishli hujjatlarsiz ijaraga berish bilan shug‘ullanib kelgan Marg‘ilon shahrida yashovchi Bekzod A.ning xatti-harakatlariga huquqiy baho berish yuzasidan tegishli choralar ko‘rilmoqda va tergov harakatlari olib borilmoqda.
Bundan avval Toshkentda 9 yoshli qizning telefonini tortib olib, uni sotib yuborgan juftlik qo‘lga olingani, Qo‘yliqda fohishalik qiluvchi ayol mijoz sifatida kelgan erkakning telefoni va 500 dollarini tunab ketgani hamda Sergelida Gentra’ni olib qochib, uning qismlarini sotib yuborgan shaxs qo‘lga olingani haqida xabar berilgandi.
Izoh (0)