Sergelining “Sputnik-4” mavzesida daraxtlar ekskavator bilan qo‘porib tashlanayotgani aks etgan videoyozuvlar ijtimoiy tarmoqlarda tarqalgan edi. Ushbu holat yuzasidan Toshkent shahar ekologiya va atrof muhitni muhofaza qilish boshqarmasi matbuot xizmati izoh berdi.

Aniqlanishicha, ko‘rsatilgan hududda har xil turdagi 14 ta daraxt hech qanday ruxsatnomasiz ildiz qismidan qo‘porib tashlangan. Daraxtlar Tashkent Industrial Export Center qurilish maydoniga olib kirilgan, oltita daraxt ko‘chirib o‘tqazilgan (avvalroq boshqarma to‘rtta daraxt “Eko industrial park”ga ko‘chirib o‘tqazilgani haqida axborot bergandi).

Foto: Toshkent shahar ekologiya va atrof muhitni muhofaza qilish boshqarmasi

“Holat yuzasidan o‘simlik dunyosiga jami 151,19 million so‘m zarar yetkazilgan, to‘plangan hujjatlar xuquqni muhofaza qilish organlariga yuborilgan”, — deyiladi boshqarma axborotida.

Foto: Toshkent shahar ekologiya va atrof muhitni muhofaza qilish boshqarmasi

O‘zbekistonda 2020-yil 3-dekabrdan kuchga kirgan qonunga muvofiq, o‘rmon yoki boshqa dov-daraxtlarni qonunga xilof ravishda kesishda aybdor deb topilganlar bazaviy hisoblash miqdori (BHM)ning 100 baravari (19-yanvar holatiga ko‘ra 22,3 million so‘m)dan 150 baravari (33,45 million so‘m)gacha miqdorda jarima yoki 240 soatdan 300 soatgacha majburiy jamoat ishlari yoki 1 yildan 2 yilgacha axloq tuzatish ishlari yoxud 1 yildan 2 yilgacha ozodlikni cheklash yoki 3 yilgacha ozodlikdan mahrum qilish bilan jazolanadi.