Navoiy viloyati Nurota tumanida 7-fevral, yakshanba kuni sodir bo‘lgan yo‘l-transport hodisasida ikki kishi halok bo‘ldi. Bu haqda “Bu kun” informatsion dasturida xabar qilindi.
Ma’lum qilinishicha, 7-fevral kuni soat 14:00 da Nurota tumani hududidan o‘tuvchi 4R–55 avtomobil yo‘lining Samarqand—Nurota yo‘nalishi bo‘yicha harakatlanib kelayotgan 26 yoshli haydovchi boshqaruvidagi Cobalt o‘zidan oldinda harakatlanib ketayotgan avtomashinani quvib o‘tayotgan vaqtida qarama-qarshi yo‘nalishda harakatlanib ketayotgan Tico bilan o‘zaro to‘qnashib ketgan.
Sodir bo‘lgan avtohalokat natijasida yong‘in kelib chiqib, Tico haydovchisi kuyish tan jarohatlarini olib, voqea joyida halok bo‘lgan. Avtomobilning old o‘rindig‘ida o‘tirgan yo‘lovchi ham ko‘rsatilgan yordamga qaramasdan halok bo‘lgan.
Shuningdek, orqa o‘rindiqdagi ikki nafar yo‘lovchi ham turli tan jarohatlari olgan. Hozirda ular Nurota tumani markaziy shifoxonasining jonlantirish bo‘limiga yotqizilgan.
Yuqoridagi holat bo‘yicha Nurota tuman IIB tomonidan tergovga qadar surishtiruv ishlari olib borilmoqda.
Bundan avval Zarafshonda Matiz va yuk mashinasi to‘qnashuvi oqibatida haydovchilardan biri vafot etgani, Toshkentda “KamAZ”ga yo‘l bermagan Equinox Nexia’ga, yuk mashinasi esa yo‘l chetidagi binoga borib urilgani hamda Qoraqalpog‘istonda mast haydovchi boshqaruvidagi Nexia-3 yo‘l chetida turgan beshta mashinaga borib urilgani haqida xabar berilgandi.
Izoh (0)