Aziz Abduhakimov amerikaliklarni muvaffaqiyatli vaksina yaratgani bilan tabrikladi

O‘zbekiston bosh vaziri o‘rinbosari, Turizmni rivojlantirish davlat qo‘mitasi raisi Aziz Abduhakimov amerikaliklarni koronavirusga qarshi muvaffaqiyatli vaksina yaratgani bilan tabrikladi, deb xabar beradi “Podrobno.uz”.

“Jo Bayden emlandi. Amerikalik sheriklarimiz va do‘stlarimizni yaxshi vaksinaga ega bo‘lgani bilan tabriklaymiz. Jo Bayden kabi inson emlandimi, bu vaksina ishonchli ekanligi va u ishlashidan dalolat beradi. Boshqa davlatlarda ham bu kabi vaksinalar ishlayotganini ko‘ryapmiz. Umid qilamanki, tez orada butun dunyo vaksinatsiyadan o‘tadi va turizm bozori qayta tiklanadi”, — deydi Abduhakimov.

AQShda koronavirusga qarshi emlash 14-dekabr kuni — Pfizer va BioNTech vaksinasi ma’qullanganidan keyin ikki kun o‘tib boshlandi. 18-dekabr kuni esa Amerika hukumati Moderna kompaniyasining vaksinasini ham ma’qulladi. 22-dekabr kuni Jo Bayden jonli efirda koronavirusga qarshi Pfizer va BioNTech vaksinasi bilan emlandi.

Eslatib o‘tamiz, O‘zbekistonda hozirda Xitoy rekombinant vaksinasining uchinchi faza klinik sinovlari o‘tkazilmoqda. Innovatsion rivojlanish vaziri Ibrohim Abdurahmonovning so‘zlariga ko‘ra, vaksinalar sinovida hozircha nojo‘ya ta’sir aniqlanmagan. Shuningdek, dekabr oyi boshlarida Rossiya sanoat va savdo vaziri Denis Manturov O‘zbekistonda ro‘yxatdan o‘tkazish va mamlakat hududida vaksinalar ishlab chiqarish sanoatini ishga tushirish uchun zarur bo‘lgan koronavirusga qarshi “Sputnik V” vaksinasining 100 ta dozasini shaxsan o‘zi Toshkentga olib kelgan edi. Noyabr oxirida esa sog‘liqni saqlash vaziri 2020-yil oxiri yoki 2021-yil boshlarida O‘zbekiston “Sputnik V” vaksinasining klinik sinovlariga kirishishni mo‘ljallayotganini ma’lum qilgandi. O‘zbekistonda 2021-yilning iyuniga qadar 60 foizgacha aholini koronavirusga qarshi emlash rejalashtirilgan.