O‘zbekiston Sog‘liqni saqlash vaziri 2020-yil oxiri yoki 2021-yil boshlarida Rossiyada yaratilgan “Sputnik V” vaksinasining klinik sinovlariga kirishishni mo‘ljallamoqda. Bu haqda idora rahbari Abduhakim Xojiboyevga tayanib, “RIA Novosti” xabar berdi.
Foto: RTIF
Sentabr oyida Rossiya to‘g‘ridan to‘g‘ri investitsiyalar fondi (RTIF) O‘zbekistonning Laxisam farmatsevtika kompaniyasi bilan mamlakatda 35 million doza “Sputnik V” vaksinasini yetkazib berish bo‘yicha kelishuvga erishganini ma’lum qilgandi. Keyinroq Laxisam yetkazib berish bo‘yicha respublikaning nazorat qiluvchi organlari bilan muvofiqlashtirish ishlar olib borilayotganini bildirgan.
“RTIF’ning ijobiy javobidan so‘ng, yil oxirida yoki keyingi yil boshidan ushbu vaksinaning klinik sinovlariga kirishishni rejalashtiryapmiz”, — deydi Xojiboyev.
Vazirning so‘zlariga ko‘ra, Sog‘liqni saqlash vazirligi RTIF bilan muzokaralar davomida “Sputnik V” vaksinasining 500 dozasini olish bo‘yicha so‘rov yuborgan.
“Xitoylik hamkorlarda hozirda klinik sinovlar uchun O‘zbekistonga o‘zining vaksinasidan 6 ming dozani yetkazib keldi”, — deya qo‘shimcha qiladi Xojiboyev.
Avvalroq O‘zbekiston COVID-19 vaksinasi klinik sinovlarining barcha bosqichi yakunlanmagunicha uni sotib olmasligi ma’lum qilingandi. Avgust oyi boshlarida Shavkat Mirziyoyev koronavirusga qarshi vaksinani xarid qilish masalasini o‘rganishga bir hafta muddat bergandi. Prezident topshirig‘iga binoan vaksinani xarid qilish va mamlakat aholisini emlashni amalga oshirish yo‘llarini o‘rganib chiqish maqsadida yetakchi olimlar va tajribali shifokorlardan iborat ishchi guruh tuzilgan.
