“Servis xizmati bo‘lmagani sababli yarim yildan buyon ishlatilmay turgan juda qimmat tibbiy texnikalar bor”. Muhandis-texnolog bilan suhbat

O‘zbekistonda tibbiy-texnika buyumlariga servis xizmat ko‘rsatish yo‘q, desa ham bo‘ladi. Bu haqda muhandis-texnolog Saidikrom Axrorov jurnalist Musulmonbek Ibrohimovga bergan intervyusida aytib o‘tdi.

Ma’lumot uchun, Saidikrom Axrorov O‘zbekistonda tibbiyot buyumlari bilan ta’minlash ishlariga 1985—2003-yillarda rahbarlik qilgan, muhandis-texnolog. Ispaniya va Birlashgan Arab Amirliklarida 2003—2017-yillarda faoliyat yuritgan. Hozirda tibbiyot buyumlari ishlab chiqarishga ixtisoslashgan “Medinvest” korxonasi rahbari.

Muhandisning alohida ta’kidlashicha, hozirgi vaqtda O‘zbekistonda tibbiy texnika buyumlarini ta’mirlash va servis xizmat ko‘rsatish deyarli yo‘q darajada.

Servis masalasida ishim tushganda, yarim yildan beri kompyuter tomografiyasi ishlamay turganiga guvoh bo‘ldim. Sababini so‘rasam, servis yo‘q deyishdi. U noyob va qimmat texnika — yarim million dollar turadi. Chet elda bunday texnika bir kun ham bo‘sh turmaydi, bir minuti ham pul. Ko‘rdimki, O‘zbekistonda tibbiy texnika buyumlariga servis xizmati ko‘rsatish yo‘q, desa bo‘ladi. Hozirgi servisga achinaman. Nimagaki, avvallari Toshkent shahri va viloyatlarda muhandislar guruhlari bor edi. Hozir o‘sha joylar bo‘sh turibdi. Hammasi har tomonga tarqab ketgan.

O‘zim muhandisman, jonim kuyadi. Noyob, qimmat texnikalar xalqning puliga olib keltirib, ishlatmasdan qo‘yib qo‘ysa yoki shifokorlarga o‘sha texnikalarni o‘rgatadigan odam bo‘lmasa, buning kimga keragi bor?

Inqirozga qarshi kurash fondidan 700 ta sun’iy nafas oldirish uskunasi olib kelindi. Undan keyin Amerika 200, Turkiya 100 ta apparat berdi. Qariyb ming dona apparat birdaniga keldi. Bu apparatlar qayerga o‘rnatildi, qay biri ishlayapti yoki ishlamayapti? Bular haqida jamoatchilikda ma’lumot yo‘q. Biz muhandis sifatida o‘sha apparatlarga servis xizmat ko‘rsatishda yordam berish uchun mas’ullardan rasmiy ma’lumot so‘raganimizda ular hech qanday javob bermadi. Negadir juda yopiq ishlashyapti. Shuning uchun bu soha jamoatchilikning ko‘p e’tiroziga sabab bo‘lmoqda.

Saidikrom Ahrorov, muhandis-texnolog