O‘zbekiston koronavirusga qarshi vaksinalarni ishlab chiqaruvchi hindistonliklar bilan muzokaralar olib bormoqda. Bu haqda Hindistonning O‘zbekistondagi elchisi Manisha Prabxata “O‘zbekiston 24” telekanaliga bergan intervyusida ma’lum qilgan.
“Hindiston vaksinalarni ishlab chiqarish bo‘yicha yetarlicha quvvatga ega. Ayni paytda mamlakatimizda uchta vaksina ishlab chiqarilmoqda. Ulardan biri klinik sinovlarning uchinchi bosqichida, qolgan ikkitasi ikkinchi bosqichda. Tez orada ushbu vaksinalarni ishlab chiqarish boshlanadi, odamlar foydalanish imkoniga ega bo‘ladi. O‘zbekiston vakillari Hindiston kompaniyalari bilan muzokaralar olib bormoqda. Umid qilamizki, ushbu muzakaralar muvaffaqiyatli bo‘ladi”, — degan u.
“Hindiston vaksinasi haqida gapiradigan bo‘lsak, unda asos sifatida kuchsizlantirilgan virus zarrasi olingan. Uning yaratilishida oqsil zarrasi klonlashtiriladi, so‘ng rekombinant oqsillar hosil bo‘ladi. Ushbu vaksinada virus komponentida mavjud bo'lgan tarkibiy qismlar mavjud emas”, — degan Innovatsion rivojlantirish vaziri Ibrohim Abdurahmonov.
Farmasevtika sanoatini rivojlantirish agentligi direktori o‘rinbosari Alisher Temirovning so‘zlariga ko‘ra, bugungi kunda O‘zbekiston Hindiston bilan koronavirusga qarshi vaksina ishlab chiqarishni tashkil etish hamda vaksina ishlab chiqish tadqiqotlarini hamkorlikda o‘tkazishga alohida e’tibor qaratmoqda. “Bugungi kunda Zydus Cadila, Bharat Biotech va boshqa kompaniyalar bilan muzokaralar olib borilmoqda”, — degan u.
Hindiston tibbiy tadqiqotlar kengashi bilan hamkorlikda ishlab chiqilgan Bharat Biotech kompaniyasi vaksinasi — Covaxin uchinchi bosqich sinovida bo‘lib, kutilganidan bir necha oy oldin foydalanishga topshirilishi mumkin. So‘nggi bosqich sinovlari noyabr oyida boshlangan va dastlabki natijalar uning xavfsiz va samarali ekanligini ko‘rsatgan.
Zydus Cadila o‘zining ZyCoV-D vaksinasining 3-bosqich sinovlarini 30 ming kishida o‘tkazishi kutilmoqda. Tadqiqot boshlanishi dekabr oyiga mo‘ljallangan. Ayni paytda kompaniya ming nafar ishtirokchida ikkinchi bosqich sinovlarini yakunladi va tegishli ma’lumotlarni shu oyda nazorat qiluvchi idoraga topshirishni rejalashtirmoqda.
Eslatib o‘tamiz, O‘zbekiston COVAX dasturiga 2020-yilning avgust oyida qo‘shilgan. Dastur shartlariga ko‘ra, daromad darajasi yuqori bo‘lgan davlatlar vaksinalar xaridi uchun pul to‘laydi va shu tariqa bu sohadagi moliyalashtiriladigan davlatlarga subsidiya beradi. Ushbu dastur doirasida ishtirok etayotgan barcha 190 mamlakat, shu qatorda O‘zbekiston ham, 2021-yilning birinchi yarmidayoq vaksina zaxirasidan foydalanish imkoniga ega bo‘ladi.
Sanitariya-epidemiologiya xizmati boshlig‘ining o‘rinbosari, tibbiyot fanlari doktori Nurmat Otabekov O‘zbekistonga vaksina kelsa, birinchi navbatda 65 yoshdan yuqori bo‘lgan shaxslar, tibbiyot xodimlari, o‘qituvchilar, bog‘chalar tarbiyachilari emlanishini ma’lum qilgan.
Innovatsion rivojlanish vaziri Ibrohim Abdurahmonov Toshkent shahrida joylashgan uchta poliklinikada ko‘ngillilarda koronavirusga qarshi vaksinalar sinovi o‘tkazilayotganini, vaksinalar sinovida hozircha nojo‘ya ta’sir aniqlanmaganini bildirgan.
Izoh (0)