Азиз Абдуҳакимов америкаликларни муваффақиятли вакцина яратгани билан табриклади

Ўзбекистон бош вазири ўринбосари, Туризмни ривожлантириш давлат қўмитаси раиси Азиз Абдуҳакимов америкаликларни коронавирусга қарши муваффақиятли вакцина яратгани билан табриклади, деб хабар беради «Podrobno.uz».

«Жо Байден эмланди. Америкалик шерикларимиз ва дўстларимизни яхши вакцинага эга бўлгани билан табриклаймиз. Жо Байден каби инсон эмландими, бу вакцина ишончли эканлиги ва у ишлашидан далолат беради. Бошқа давлатларда ҳам бу каби вакциналар ишлаётганини кўряпмиз. Умид қиламанки, тез орада бутун дунё вакцинациядан ўтади ва туризм бозори қайта тикланади», — дейди Абдуҳакимов.

АҚШда коронавирусга қарши эмлаш 14 декабрь куни — Pfizer ва BioNTech вакцинаси маъқулланганидан кейин икки кун ўтиб бошланди. 18 декабрь куни эса Америка ҳукумати Moderna компаниясининг вакцинасини ҳам маъқуллади. 22 декабрь куни Жо Байден жонли эфирда коронавирусга қарши Pfizer ва BioNTech вакцинаси билан эмланди.

Эслатиб ўтамиз, Ўзбекистонда ҳозирда Хитой рекомбинант вакцинасининг учинчи фаза клиник синовлари ўтказилмоқда. Инновацион ривожланиш вазири Иброҳим Абдураҳмоновнинг сўзларига кўра, вакциналар синовида ҳозирча ножўя таъсир аниқланмаган. Шунингдек, декабрь ойи бошларида Россия саноат ва савдо вазири Денис Мантуров Ўзбекистонда рўйхатдан ўтказиш ва мамлакат ҳудудида вакциналар ишлаб чиқариш саноатини ишга тушириш учун зарур бўлган коронавирусга қарши «Спутник V» вакцинасининг 100 та дозасини шахсан ўзи Тошкентга олиб келган эди. Ноябрь охирида эса соғлиқни сақлаш вазири 2020 йил охири ёки 2021 йил бошларида Ўзбекистон «Спутник V» вакцинасининг клиник синовларига киришишни мўлжаллаётганини маълум қилганди. Ўзбекистонда 2021 йилнинг июнига қадар 60 фоизгача аҳолини коронавирусга қарши эмлаш режалаштирилган.