“Daryo” o‘tayotgan haftada sodir bo‘lgan eng muhim voqealarni sharhlab o‘tadi.
Hafta boshida xalq ta’limi vaziri Sherzod Shermatov ijtimoiy tarmoqdagi sahifasida ota-onalarga “Farzandingiz Prezident maktabida o‘qishini istasangiz, ingliz tilini o‘rgatishni boshlang”, deya maslahat berdi. Islohotchi vazir sifatida nom chiqargan janob Shermatov hozirgi kunda ingliz tilini o‘rganish naqadar muhimligini izohlab, internetdagi foydali resurslarni keltirdi. Taklif ko‘plab mulohazalar va bahslar eshigini ochdi. “Ishonch” nashrida O‘rol Sodiq ismli muallif til o‘rganish imtiyoz yo‘lida garovga aylantirib qo‘yilmasligi zarur, deb Shermatovga tanqidiy javob yo‘lladi.
* * *
Samarqand viloyatining Payariq shahrida biqiniga “Alloh” deb yozilgan qo‘zichoq tug‘ildi. Rasmdan ko‘rinishicha, yozuv aynan arabcha “Alloh” kalimasiga o‘xshamaydi. Biroq xonadonga ziyoratchilar kelib ketmoqda va bundan xonadon egalari xursand.
* * *
O‘zbekiston fuqarolari chiroyli avtoraqamlarga “to‘ydi”: onlayn auksion orqali avtomobil raqamlari sotuvi keskin kamaydi. Sotilgan davlat raqam belgilarining umumiy summasi deyarli 1,8 milliard so‘mni tashkil qildi. Chiroyli raqam ishqibozlari Toshkent shahri va viloyatida, undan keyin Buxoro, Surxondaryo va Farg‘ona viloyatlarida yashashini statistika ko‘rsatdi.
* * *
Qoraqalpog‘istonda donasi 40 kilogrammlik lavlagi yetishtirildi. “Abdullajon” kinosidagi sabzavotlarni eslatuvchi ulkan lavlagilar to‘rtko‘llik Rimajon opa xonadonida yetishtirilgan. Rimajon opa o‘tgan yili 20 tonnadan ortiq hosil yetishtirgan.
* * *
14-mart kuni kechasi soat 02:32 da O‘zbekiston-Qozog‘iston chegarasida davomli zilzila sodir bo‘ldi. Zilzila markazi Toshkentdan 28 kilometr uzoqlikda joylashgan. Toshkent shahrida zilzila kuchi 4 ballga, Guliston va Jizzaxda 2 ballga teng bo‘ldi. Vayronaliklar va jabrlanganlar haqida ma’lumot yo‘q.
* * *
O‘zbekiston Milliy olimpiya qo‘mitasi, O‘zbekiston futbol federatsiyasi sobiq rahbari, senator Mirabror Usmonov vafot etdi. U 12-mart kuni o‘pka va nafas yo‘llari bilan bog‘liq kasallik sabab Milliy olimpiya qo‘mitasi klinikasining reanimatsiya bo‘limiga yotqizilgandi. Marhumning xonadoniga Prezident Shavkat Mirziyoyev tashrif buyurib, oila a’zolariga hamdardlik bildirdi. Turli nashrlar jurnalistlari marhumning ayrim xislatlarini eslab xotira maqolalari yozdi.
* * *
Namanganda rekord darajadagi 6 tonna sumalak pishirish uchun tayyorgarlik ishlari ketmoqda. Sayil tariqasida o‘tkaziladigan sumalak bayrami uchun 10 tonnali ulkan qozon yasatildi. Bahaybat qozon-o‘choq va kapkir-cho‘michlar Olmaliq metallurgiya kombinatida tayyorlangan.
* * *
Jizzax neftni qayta ishlash zavodi qurilishi to‘xtatildi. Undan avval Farg‘ona va Buxorodagi mavjud zavodlar modernizatsiyasiga e’tibor qaratiladigan bo‘ldi. Bu ikki zavod takomillashtirib bo‘lingach, Jizzax zavodini qurish masalasi ko‘rib chiqilishi mumkin.
* * *
Qashqadaryoda eski shiyponda barpo etilgan xarob ahvoldagi maktab haftaning keng muhokamalariga sabab bo‘ldi. “Daryo” muxbiri Otabek Qo‘ldoshev holatni o‘rganish uchun G‘uzorda bo‘ldi va tomidan chakka o‘tadigan, sovuq va qarovsiz ta’lim dargohidagi holatni saytimizda yoritdi. Aniqlanishicha, bu bino maktab filiali bo‘lib 16 yildan beri holat o‘nglanmagan.
* * *
Haftaning mamlakat hayotida muhim voqealaridan biri, shubhasiz, Humo Arena muz saroyining ochilishi bo‘ldi. Prezident Shavkat Mirziyoyev muz saroyining ochilish marosimida ishtirok etdi va rossiyalik bir qancha sportchilarga Toshkentdan uy berdi. Ushbu sportchilar O‘zbekistonda qishki sportni rivojlantirishidan umid qilinmoqda. Shuningdek, saroy ochilish marosimida rossiyalik taniqli qo‘shiqchi Dima Bilan kuylab berdi. Marosimda olti ming mehmon qatnashdi.
Izoh (0)