Namanganda yana bir soxta prokuror ushlandi. U “Toshkentdagi o‘qish xarajatlari ” uchun pul so‘ragan

Kosonsoy tumanining Tagijar mahallasida yashovchi I.M. muqaddam firibgarlik jinoyatiga qo‘l urgani uchun ikki bor sudlangan. Biroq bundan xulosa chiqarmay, yana eski qilmishlarini davom ettirdi. Bu haqda “Daryo”ga Jinoyat ishlari bo‘yicha Namangan shahar sudi sudyasi Sultonmaqsud Xolbotirov ma’lum qildi.

U 2018-yil 16-noyabr kuni Kosonsoy buyum bozori direktoriga qo‘ng‘iroq qilib, o‘zini prokuratura xodimi Bekzod sifatida tanishtiradi. Hozirda Toshkent shahrida o‘qishdaligi, xarajatlar uchun 200 AQSh dollari kerakligi, o‘qishdan qaytganidan so‘ng qaytarib berishni aytib, pulni oladi, biroq qaytarib bermaydi.

2018-yil 6-dekabr kuni To‘raqo‘rg‘on tuman tibbiyot birlashmasi bosh vrachiga qo‘ng‘iroq qilib, unga ham o‘zini prokuratura xodimi Bekzod sifatida tanishtiradi. Eski usul takrorlanadi: o‘qishdaligi , 200 dollar zarur bo‘lib qolganini aytadi. So‘ralgan pulni berib tursa kelgusida shifoxonada prokuratura tomonidan o‘tkaziladigan tekshiruvlarda qo‘llab turishini aytadi. Tibbiyot birlashmasi bosh vrachi bu shartga go‘yoki rozi bo‘ladi va tamagirlik holati haqida huquq-tartibot idorasiga xabar beradi.

Shundan so‘ng tezkor tadbir uyushtirildi. I.M. Namangan — Kosonsoy yo‘nalishida kirakashlik bilan shug‘ullanuvchi B.Abdullayev orqali Namangan shahar, 2-kichik tumandagi bank binosi oldida tadbir ishtirokchisidan kimyoviy ishlov berilgan 1.600.000 so‘mni olganda ushlandi. Unga nisbatan jinoyat ishi ochilib, javobgarlikka tortildi.

Jinoyat ishlari bo‘yicha Namangan shahar sudida ushbu jinoyat ishi ko‘rib chiqilib, soxta prokurorga 3 yil ozodlikni cheklash jazosi tayinlandi. Jazoni o‘tash davrida qonunga xilof hatti-harakatlar sodir etmaslik, ijtimoiy foydali mehnat bilan shug‘ullanish, IIB roziligisiz yashash va ish joyini o‘zgartirmaslik, O‘zbekiston hududidan tashqariga chiqmaslik kabi qator cheklovlar o‘rnatildi.

Qiziq tomoni shundaki, Namanganda o‘tgan gal qo‘lga olingan soxta prokuror ham o‘zini “Bekzod” sifatida tanishtirgan va u ham To‘raqo‘rg‘on tuman tibbiyot birlashmasi bosh vrachi ishtirokida ushlangandi.