Tashqi ishlar vazirining o‘rinbosari Alisher Abdualiyev Turkiyaning Kanimed Alles Sag‘lik Cozumleri kompaniyasi bosh direktori Filiz Erdo‘g‘on bilan uchrashdi. Bu haqda TIV matbuot xizmati xabar berdi.
Prezidentning 28-fevral — 1-mart kunlari Namangan viloyatiga qilgan tashrifi chog‘ida bergan topshiriqlarini amalga oshirish doirasida Tashqi ishlar vazirligidagi uchrashuvda Uchqo‘rg‘on tumanida zamonaviy gemodializ va diagnostika laboratoriyasi markazini tashkil etish masalalari muhokama qilindi.
Muzokaralar yakunida 18-mart kuni turk delegatsiyasining viloyat va tuman hokimliklari rahbariyati bilan uchrashuv o‘tkazishi hamda bo‘lajak markazning joylashuv o‘rni va loyihani amalga oshirish bilan bog‘liq boshqa masalalarni o‘rganish uchun Uchqo‘rg‘on tumaniga borishi rejalashtirildi.
Hozirda Kanimed Alles Sag‘lik Cozumleri (Alles Sag‘lik Group) kompaniyasi O‘zbekistonning Turkiyadagi elchixonasi ko‘magida Surxondaryo viloyatining Termiz shahrida 1 million AQSh dollaridan ortiq miqdordagi to‘g‘ridan-to‘g‘ri investitsiyani jalb qilgan holda laboratoriya-diagnostika markazini barpo etish ishlarini olib bormoqda. Hafta davomida turk delegatsiyasining keyinchalik laboratoriya uskunasini o‘rnatish maqsadida markaz binosida ta’mirlash ishlarini olib borish uchun Termiz shahriga borishi rejalashtirilgan.
Izoh (0)