«Дарё» ўтаётган ҳафтада содир бўлган энг муҳим воқеаларни шарҳлаб ўтади.
Ҳафта бошида халқ таълими вазири Шерзод Шерматов ижтимоий тармоқдаги саҳифасида ота-оналарга «Фарзандингиз Президент мактабида ўқишини истасангиз, инглиз тилини ўргатишни бошланг», дея маслаҳат берди. Ислоҳотчи вазир сифатида ном чиқарган жаноб Шерматов ҳозирги кунда инглиз тилини ўрганиш нақадар муҳимлигини изоҳлаб, интернетдаги фойдали ресурсларни келтирди. Таклиф кўплаб мулоҳазалар ва баҳслар эшигини очди. «Ишонч» нашрида Ўрол Содиқ исмли муаллиф тил ўрганиш имтиёз йўлида гаровга айлантириб қўйилмаслиги зарур, деб Шерматовга танқидий жавоб йўллади.
* * *
Самарқанд вилоятининг Пайариқ шаҳрида биқинига «Аллоҳ» деб ёзилган қўзичоқ туғилди. Расмдан кўринишича, ёзув айнан арабча «Аллоҳ» калимасига ўхшамайди. Бироқ хонадонга зиёратчилар келиб кетмоқда ва бундан хонадон эгалари хурсанд.
* * *
Ўзбекистон фуқаролари чиройли авторақамларга «тўйди»: онлайн аукцион орқали автомобиль рақамлари сотуви кескин камайди. Сотилган давлат рақам белгиларининг умумий суммаси деярли 1,8 миллиард сўмни ташкил қилди. Чиройли рақам ишқибозлари Тошкент шаҳри ва вилоятида, ундан кейин Бухоро, Сурхондарё ва Фарғона вилоятларида яшашини статистика кўрсатди.
* * *
Қорақалпоғистонда донаси 40 килограммлик лавлаги етиштирилди. «Абдуллажон» киносидаги сабзавотларни эслатувчи улкан лавлагилар тўрткўллик Римажон опа хонадонида етиштирилган. Римажон опа ўтган йили 20 тоннадан ортиқ ҳосил етиштирган.
* * *
14 март куни кечаси соат 02:32 да Ўзбекистон-Қозоғистон чегарасида давомли зилзила содир бўлди. Зилзила маркази Тошкентдан 28 километр узоқликда жойлашган. Тошкент шаҳрида зилзила кучи 4 баллга, Гулистон ва Жиззахда 2 баллга тенг бўлди. Вайроналиклар ва жабрланганлар ҳақида маълумот йўқ.
* * *
Ўзбекистон Миллий олимпия қўмитаси, Ўзбекистон футбол федерацияси собиқ раҳбари, сенатор Мираброр Усмонов вафот этди. У 12 март куни ўпка ва нафас йўллари билан боғлиқ касаллик сабаб Миллий олимпия қўмитаси клиникасининг реанимация бўлимига ётқизилганди. Марҳумнинг хонадонига Президент Шавкат Мирзиёев ташриф буюриб, оила аъзоларига ҳамдардлик билдирди. Турли нашрлар журналистлари марҳумнинг айрим хислатларини эслаб хотира мақолалари ёзди.
* * *
Наманганда рекорд даражадаги 6 тонна сумалак пишириш учун тайёргарлик ишлари кетмоқда. Сайил тариқасида ўтказиладиган сумалак байрами учун 10 тоннали улкан қозон ясатилди. Баҳайбат қозон-ўчоқ ва капкир-чўмичлар Олмалиқ металлургия комбинатида тайёрланган.
* * *
Жиззах нефтни қайта ишлаш заводи қурилиши тўхтатилди. Ундан аввал Фарғона ва Бухородаги мавжуд заводлар модернизациясига эътибор қаратиладиган бўлди. Бу икки завод такомиллаштириб бўлингач, Жиззах заводини қуриш масаласи кўриб чиқилиши мумкин.
* * *
Қашқадарёда эски шийпонда барпо этилган хароб аҳволдаги мактаб ҳафтанинг кенг муҳокамаларига сабаб бўлди. «Дарё» мухбири Отабек Қўлдошев ҳолатни ўрганиш учун Ғузорда бўлди ва томидан чакка ўтадиган, совуқ ва қаровсиз таълим даргоҳидаги ҳолатни сайтимизда ёритди. Аниқланишича, бу бино мактаб филиали бўлиб 16 йилдан бери ҳолат ўнгланмаган.
* * *
Ҳафтанинг мамлакат ҳаётида муҳим воқеаларидан бири, шубҳасиз, Humo Arena муз саройининг очилиши бўлди. Президент Шавкат Мирзиёев муз саройининг очилиш маросимида иштирок этди ва россиялик бир қанча спортчиларга Тошкентдан уй берди. Ушбу спортчилар Ўзбекистонда қишки спортни ривожлантиришидан умид қилинмоқда. Шунингдек, сарой очилиш маросимида россиялик таниқли қўшиқчи Дима Билан куйлаб берди. Маросимда олти минг меҳмон қатнашди.
Изоҳ (0)