AQShning Solt-Leyk-Siti shahridagi xalqaro aeroportda Southwest Airlines aviakompaniyasining Boeing 737 yo‘lovchi samolyoti yonayotgan dvigatel bilan yerga qo‘ndirildi, deb xabar beradi “RBK”.
Aviakompaniya vakilining aytishicha, samolyot Solt-Leyk-Sitidan Los-Anjelesga uchayotgan edi. Samolyot havoga ko‘tarilganidan bir necha daqiqa o‘tganidan keyin uchuvchilar o‘ng tomondagi dvigatel ishida nosozlikni payqadi va aeroportga qaytish haqida qaror qabul qildi. Parvoz hammasi bo‘lib 30 daqiqa davom etgan.
Hodisa yuz bergan vaqtda samolyot bortida 110 nafar yo‘lovchi va besh nafar ekipaj a’zolari bo‘lgan. Havo kemasi aeroportga muvaffaqiyatli qo‘ndirilgan. Yerda samolyotni tez yordam kutib turgan edi, biroq samolyotdagilarga uning yordami kerak bo‘lmadi.
Yo‘lovchilardan biri parvoz vaqtida g‘ayrioddiy ovozlar eshitilganini, keyinroq esa samolyot silkinib, salondagi yoritish tizimi esa o‘chib yona boshlaganini ma’lum qilgan. Uning so‘zlariga ko‘ra, dvigateldan o‘t chaqnab, tutun ko‘rina boshlagan.
Samolyot avariyaviy qo‘nishni amalga oshirganidan so‘ng yo‘lovchilar Los-Anjelesga boshqa samolyotda uchirilgan.
Izoh (0)