Ukrainada o‘z joniga qasd qilgan turkmanistonlik talaba ta’lim olgan oliy o‘quv dargohi rahbariyatiga nisbatan jinoiy ish ochildi, deb xabar beradi O‘zA.
Kiyev prokuraturasi Bogomols nomli milliy tibbiyot universiteti talabasi bo‘lmish 19 yoshli turkmanistonlik o‘zbek qizi Muqaddas Nasirlayevaning o‘z joniga qasd qilish fakti bo‘yicha jinoiy ish ochdi.
Qiz oilasining advokati bergan ma’lumotga ko‘ra, vaqtincha yashash muddatini uzaytirish borasida ariza berish oliy o‘quv yurti tomonidan rad etilgach, talaba Kiyevdagi ko‘prikdan o‘zini daryoga tashlagan. Uning aytishicha, xorijiy talabalar bilan ishlash bo‘yicha dekanat o‘z vaqtida, vaqtincha yashash uchun Muqaddasning hujjatlarini migratsiya xizmatiga topshirmagan.
Prokuratura, qiz 30-yanvar kuni Kiyevdagi Paton ko‘prigidan o‘zini tashlab joniga qasd qilganini tasdiqladi.
Talaba qiz tengdoshlarining aytishicha, u universitetga 2017-yilda o‘qishga kirgan va buning uchun 7 sinfdan tayyorgarlik ko‘rgan, u stomatolog bo‘lishni orzu qilardi. Ular qizni “maqsadga intiluvchi aqlli va quvnoq” inson sifatida ta’rifladilar: u ingliz tili guruhida o‘qirdi va guruh rahbari edi. Ularning ta’kidlashlaricha, Muqaddas xorijiy talabalar bilan ishlash bo‘yicha dekan o‘rinbosari Tatyana Timoxina o‘rtasida muammo kelib chiqqan.
“Muqaddasning ota-onasi vaqtinchalik yashash borasidagi muammo to‘g‘risida bilishardi. Uning Ukrainadan chiqib ketishini, yangi viza bilan qaytadan borishini, akademik ta’til olib bir yildan keyin o‘qishni davom ettirishini aytishgan edi. Turkmanistonning Ukrainadagi elchixonasi Muqaddasning mamlakatda bo‘lish muddati rejimini buzgani uchun jarima to‘lashi kerakligini, buning uchun esa universitetdan maktub lozimligini aytishgan. Buni hal qilish borasida taklif bilan chiqilgan. Biroq dekanat buning uchun hech narsa qilmadi”, – deydi Muqaddasning tanishlari.
Universitetda talabaning migratsiya qonunchiligi bilan muammosi bo‘lgani tasdiqlandi. Uning viza muddati 2017-yil 17-dekabrda tugagan edi. Shu sababli ham u talabalar safidan chiqarilgan.
Izoh (0)