Donald Tramp CNN telekanali “fosh etilgani”dan xursandligini bildirdi

AQSh prezidenti Donald Tramp CNN telekanali “fosh etilgani”dan xursand ekanligini ma’lum qildi. Bu haqda u Twitter’dagi sahifasida yozdi.

“Va nihoyat CNN soxta yangiliklar va chiqindi jurnalistika ishlab chiqaruvchisi sifatida fosh etilganini ko‘rishdan xursandman. Allaqachon vaqti yetgandi buning!”, — deb yozdi AQSh prezidenti.

Avvalroq AQSh prezidenti CNN’ni “boshqa soxta maqolalar”ni ham o‘chirib tashlashga chaqirgan edi.

CNN telekanali 22-iyun kuni o‘z saytida AQSh prezidentining biznes bilan munosabatlar bo‘yicha sobiq maslahatchisi Entoni Skaramuchchi “Trampning inauguratsiyasidan to‘rt kun avval” Rossiyaning to‘g‘ridan-to‘g‘ri investitsiyalar jamg‘armasi rahbari Kirill Dmitriyev bilan uchrashgani haqida maqola chiqargan edi.

Telekanal mazkur uchrashuv tafsilotlariga go‘yoki Kongress a’zolari qiziqish bildirganini yozgan edi. Ko‘p o‘tmay, CNN mazkur maqolani o‘chirib tashladi, Skaramuchchidan uzr so‘radi va o‘zining uch jurnalistini ishdan haydadi.