Дональд Трамп CNN телеканали «фош этилгани»дан хурсандлигини билдирди

АҚШ президенти Дональд Трамп CNN телеканали «фош этилгани»дан хурсанд эканлигини маълум қилди. Бу ҳақда у Twitter’даги саҳифасида ёзди.

«Ва ниҳоят CNN сохта янгиликлар ва чиқинди журналистика ишлаб чиқарувчиси сифатида фош этилганини кўришдан хурсандман. Аллақачон вақти етганди бунинг!», — деб ёзди АҚШ президенти.

Аввалроқ АҚШ президенти CNN’ни «бошқа сохта мақолалар»ни ҳам ўчириб ташлашга чақирган эди.

CNN телеканали 22 июнь куни ўз сайтида АҚШ президентининг бизнес билан муносабатлар бўйича собиқ маслаҳатчиси Энтони Скарамуччи «Трампнинг инаугурациясидан тўрт кун аввал» Россиянинг тўғридан-тўғри инвестициялар жамғармаси раҳбари Кирилл Дмитриев билан учрашгани ҳақида мақола чиқарган эди.

Телеканал мазкур учрашув тафсилотларига гўёки Конгресс аъзолари қизиқиш билдирганини ёзган эди. Кўп ўтмай, CNN мазкур мақолани ўчириб ташлади, Скарамуччидан узр сўради ва ўзининг уч журналистини ишдан ҳайдади.