Barak Obama AQSh razvedkasi va Pentagonning “Jirkanch urush” — Argentina harbiy xunta nazorati ostida bo‘lgan 1976-1983-yillarga oid hujjatlardan maxfiylik tamg‘asi olinishiga ko‘rsatma beradi. Bu haqda prezidentning milliy xavfsizlik bo‘yicha yordamchisi Syuzan Rays ma’lum qildi, deya xabar beradi “TASS”.
“Prezident ‘Jirkanch urush’ davridagi hodisalarga oid hujjatlardan maxfiylik tamg‘asi olinishini e’lon qiladi. Ular orasida birinchi marta Amerika razvedkasi va Mudofaa vazirligi hujjatlari bo‘ladi”, — deya ta’kidlagan Rays.
Prezident yordamchisi Obama Argentina hukumati iltimosiga ko‘ra shunday qaror qabul qilganini bildirdi. 2002-yili AQSh Davlat departamenti Argentinada mazkur davrda inson huquqlari buzilishiga oid (xunta hukmronligi yillarida rasmiy ma’lumotlarga ko‘ra 18 ming, norasmiy manbalarga ko‘ra 30 ming kishi izsiz yo‘qolgan) 4 mingdan ziyod hujjatni e’lon qilgandi. Bu gal qancha hujjatlar chop etilishiga aniqlik kiritilmagan.
Barak Obama kelgusi haftada Kubaga tashrifdan so‘ng Argentinaga borishi ko‘zda tutilgan.
Izoh (0)