Milan apellyatsiya sudi 17-mart, payshanba kuni Italiya sobiq bosh vaziri Silvio Berluskonining o‘g‘li, Mediaset kompaniyasi vitse-prezidenti Pyer Silvio Berluskonini moliyaviy firibgarlikda ayblab, 14 oylik qamoq jazosiga hukm qildi. Kompaniya prezidenti Fedele Konfalonyeri ham shunday muddatga hukm qilindi, jinoiy ishning qolgan olti nafar ishtirokchisi oqlandi, deya xabar beradi “RBK”.
Pyer Silvio Berluskoni va Fedele Konfalonyeri Mediaset nazorati ostidagi Mediatrade kompaniyasi uchun filmlar hamda boshqa telemahsulotlar uchun huquqlar xarid qilishda firibgarlikka qo‘l urgan deb topildi. Shu tariqa apellyatsiya sudi 2014-yili ishning barcha qatnashchilarini oqlagan avvalgi sud qarorini bekor qildi. Shu bilan birga, sud prokuratura talab qilganidan ko‘ra yengilroq jazo qo‘lladi: ayblov Berluskonining o‘g‘li uchun uch yilu ikki oy, Konfalonyeriga esa uch yilu to‘rt oylik qamoq jazosi so‘ragandi.
Sud qarori Pyer Silvio Berluskoni darrov qamoqqa jo‘natilishini anglatmaydi: Italiyada unchalik katta bo‘lmagan jazo muddatlari, odatda, ularni o‘tashning kechiktirilishini bildiradi.
Izoh (0)