BMT Bosh kotibi Pan Gi Mun 100 dan ziyod kishi qurbon bo‘lishiga olib kelgan Saudiya Arabistoni boshchiligidagi arab koalitsiyasining Yamandagi bozorga bergan aviazarbasini qoraladi. Bu haqda “TASS” xabar bermoqda.
“Bosh kotib Yamanning Xaja viloyatidagi Mustaba shahrining al-Xamis bozoriga berilgan aviazarbalarni qoralaydi. Bu shunga o‘xshash birinchi hodisa emas — 27-fevralda koalitsiya harbiy-havo kuchlari Sano viloyatidagi bozorga zarba bergan va buning oqibatida o‘ttizdan ziyod kishi halok bo‘lgandi. Tinch aholi yoki fuqarolik obyektlariga qasddan hujum xalqaro gumanitar huquqning jiddiy buzilishidir. Shu kabi hodisalarning barchasini tezkorlik bilan, samarali, mustaqil va xolis tekshiruvdan o‘tkazish o‘ta muhim ahamiyatga ega”, — deyiladi Pan Gi Mun devonxonasi tomonidan tarqatilgan kommyunikeda.
Eslatib o‘tamiz, so‘nggi ma’lumotlarga ko‘ra arab koalitsiyasining Mustaba shahridagi bozorga bergan ikki aviazarbasi oqibatida halok bo‘lganlar soni 119 kishiga yetgan.
Izoh (0)