Барак Обама АҚШ разведкаси ва Пентагоннинг «Жирканч уруш» — Аргентина ҳарбий хунта назорати остида бўлган 1976-1983 йилларга оид ҳужжатлардан махфийлик тамғаси олинишига кўрсатма беради. Бу ҳақда президентнинг миллий хавфсизлик бўйича ёрдамчиси Сюзан Райс маълум қилди, дея хабар беради «ТАСС».
«Президент ‘Жирканч уруш’ давридаги ҳодисаларга оид ҳужжатлардан махфийлик тамғаси олинишини эълон қилади. Улар орасида биринчи марта Америка разведкаси ва Мудофаа вазирлиги ҳужжатлари бўлади», — дея таъкидлаган Райс.
Президент ёрдамчиси Обама Аргентина ҳукумати илтимосига кўра шундай қарор қабул қилганини билдирди. 2002 йили АҚШ Давлат департаменти Аргентинада мазкур даврда инсон ҳуқуқлари бузилишига оид (хунта ҳукмронлиги йилларида расмий маълумотларга кўра 18 минг, норасмий манбаларга кўра 30 минг киши изсиз йўқолган) 4 мингдан зиёд ҳужжатни эълон қилганди. Бу гал қанча ҳужжатлар чоп этилишига аниқлик киритилмаган.
Барак Обама келгуси ҳафтада Кубага ташрифдан сўнг Аргентинага бориши кўзда тутилган.
Изоҳ (0)