BMTdagi korrupsiya bo‘yicha ayblanayotgan shaxslar ishni ko‘rib chiqish yakunlangunga qadar hibsdan ozod etildi. 26-oktabr, dushanba kuni Nyu-Yorkning Manxetten sudi shunday qaror qabul qildi, deya xabar beradi “TASS”.
BMT Bosh assambleyasining sobiq sessiya rahbari, Antigua va Barbudaning xalqaro tashkilotdagi sobiq vakili Jon Esh 1 million dollar, xitoylik biznesmen Nglep Sen 50 million dollar, Dominikan respublikasining sobiq diplomati Frensis Lorenso esa 2 million dollar tovon puli evaziga qo‘yib yuborildi.
Esh 6-oktabr kuni Nyu-Yorkdagi kvartirasida Nglep Sen va boshqa biznesmenlardan Makaoda BMT binosi qurilishini qo‘llab-quvvatlash uchun 500 ming dollardan ziyod mablag‘ olganlikda ayblanmoqda. Buning evaziga Esh BMT bosh kotibiga Makaoda konferens-markaz qurilishi zarur ekanligi to‘g‘risida hujjat topshirgan. Qo‘shimcha ravishda Esh xitoyliklardan yana 800 ming dollar olgani bildirilmoqda. 25—26-avgust kunlari diplomat Bosh assambleya raisi sifatida Xitoydagi konferensiyada ishtirok etgan va ayblov da’vosiga ko‘ra, buning uchun ham pora olgan.
Tekshiruv doirasida rasmiy shaxsga pora berish uchun til biriktirishda ayblanib, Dominikan Respublikasi diplomati ham qamoqqa olingan edi.
Izoh (0)