БМТдаги коррупция бўйича айбланаётган шахслар ишни кўриб чиқиш якунлангунга қадар ҳибсдан озод этилди. 26 октябрь, душанба куни Нью-Йоркнинг Манхэттен суди шундай қарор қабул қилди, дея хабар беради «ТАСС».
БМТ Бош ассамблеясининг собиқ сессия раҳбари, Антигуа ва Барбуданинг халқаро ташкилотдаги собиқ вакили Жон Эш 1 миллион доллар, хитойлик бизнесмен Нглэп Сен 50 миллион доллар, Доминикан республикасининг собиқ дипломати Фрэнсис Лоренсо эса 2 миллион доллар товон пули эвазига қўйиб юборилди.
Эш 6 октябрь куни Нью-Йоркдаги квартирасида Нглэп Сен ва бошқа бизнесменлардан Макаода БМТ биноси қурилишини қўллаб-қувватлаш учун 500 минг доллардан зиёд маблағ олганликда айбланмоқда. Бунинг эвазига Эш БМТ бош котибига Макаода конференц-марказ қурилиши зарур эканлиги тўғрисида ҳужжат топширган. Қўшимча равишда Эш хитойликлардан яна 800 минг доллар олгани билдирилмоқда. 25—26 август кунлари дипломат Бош ассамблея раиси сифатида Хитойдаги конференцияда иштирок этган ва айблов даъвосига кўра, бунинг учун ҳам пора олган.
Текширув доирасида расмий шахсга пора бериш учун тил бириктиришда айбланиб, Доминикан Республикаси дипломати ҳам қамоққа олинган эди.
Изоҳ (0)