Rossiyada qora ikra bilan to‘ldirilgan tobutni ortib ketayotgan katafalk qo‘lga tushirildi

Rossiyaning Xabarovsk o‘lkasida yo‘l-patrul xizmati xodimlari diniy marosimlar agentligi avtobusini tezlikni oshirgani uchun to‘xtatganida, tobut ichiga solib qo‘yilgan 0,5 tonna qora ikrani aniqladi, deya xabar bermoqda “RIA Novosti” IIV rasmiy vakiliga tayanib.

Avtomobilni boshqargan erkak ayol kishining jasadini olib ketayotganini aytgan. Ma’muriy hujjat tuzish chog‘ida politsiyachilar haydovchidan salonni ko‘rsatishni so‘ragan. Salonda jasad bo‘lmagan, tobut ichidan esa politsiyachilar termoo‘ramga solingan ikra konteynerlarini topgan.

Diniy agentlikning ikki ishchisi qo‘lga olingan. Biroq ular tobut ichiga jasad o‘rniga boshqa narsa solinganidan bexabarligi, uni o‘zlariga noma’lum kishilar buyurtmasiga binoan olib ketayotganini aytgan.

Politsiya o‘ta qimmatli biologik suv resurslarini noqonuniy qo‘lga kiritish va tashishga aloqador kishilarni qidirmoqda.