AQSHning Shimoliy Karolina shtati Sharlott shahridagi federal sudi Markaziy razvedka boshqarmasi (MRB) sobiq direktori Devid Petreusni maxfiy axborotlarni jazmaniga bildirgani uchun ikki yilga shartli ravishda ozodlikdan mahrum etdi. Bu haqda Associated Press agentligi xabar bermoqda.
Shuningdek, Petreus 100 ming dollar miqdorida jarima ham to‘lashi kerak, vaholanki, ayblovchi tomon uni atigi 40 ming dollar miqdorida jarima to‘lashga majbur qilishni so‘ragan edi. Sudya Devid Kesslerning qayd etishicha, Petreus tomonidan amalga oshirilgan “jinoyatning jiddiyligi” sabab u jarima miqdorini oshirish haqida qaror qabul qilgan.
Razvedkaning sobiq rahbari esa, o‘z o‘rnida, o‘ziga nisbatan ilgari surilgan ayblovni to‘liq tan olgan va o‘z harakatlari uchun kechirim so‘ragan.
Ma’lumot uchun, Devid Petreus 37 yildan ortiq AQSH qurolli kuchlarida xizmat qilgan. 2011-yil sentyabrida uni MRB rahbari etib tayinlashgandi. 2012-yil noyabrida esa o‘z biografi Paula Brodvell bilan “yurib ketgani” uchun iste’fo bergandi.
2015-yil yanvarida Petreus o‘zining tarjimai holini yozayotgan Brodvellga maxfiy agentlarning ismlari va urush strategiyalari bo‘lgan Afg‘onistondagi operatsiyalarga oid hujjatlarni topshirganlik va AQSH prezidenti Barak Obama bilan suhbatlari mazmunini ma’lum qilganlikda ayblandi.
Izoh (0)