Hindistonning Bihar shtatiga yopirilgan bo‘ron natijasida 55 kishi halok bo‘ldi, 80 dan ortiq odam tan jarohati oldi. Bu haqda NDTV telekanali xabar bermoqda.
Tabiiy ofatdan Biharning umumiy hisobda 12ta tumani zarar ko‘rgan. Amaldorlarning fikricha, Hindiston tabiatini oldindan bilib bo‘lmaslik va bo‘ronning yaqinlashib kelayotganini oldindan ko‘ra bilmagan sinoptiklar fojeaning asosiy sababchilaridir. Shtat bosh vaziri Nitish Kumarning ma’lum qilishicha, Hindiston bosh vaziri Narendra Modi shtatga barcha zaruriy yordamni ko‘rsatishga va’da bergan.
Kommunal xizmatlar hozirgi vaqtda tabiiy ofatdan zarar ko‘rgan tumanlar bilan transport aloqasini o‘rnatishyapti, elektr ta’minotini qayta tiklashyapti va telefon liinyalarini to‘g‘rilashyapti. Bihar shtati hukumati halok bo‘lganlarning oila a’zolariga 400 ming rupiy (6,3 ming dollar) miqdorida kompensatsiya puli berilishini ma’lum qilgan. Bundan tashqari, boshpanasidan mahrum bo‘lganlar qo‘shimcha ravishda 25 kilogramm g‘alla, kiyim-kechak sotib olish uchun 1,8 ming (taxminan 30 dollar), idish-tovoq sotib olish uchun 2 ming rupiy (taxminan 31 dollar) va yana shuncha naqd pul olishadi.
Agrar sohaga ixtisoslashgan Bihar shtati Hindiston sharqida joylashgan bo‘lib, iqtisodiyotining juda sust o‘sayotgani bilan ajralib turadi. Yalpi hududiy mahsulotining hajmi bo‘yicha Bihar Hindiston shtatlari orasida eng oxirgi, ayni vaqtda, aholi soni bo‘yicha uchinchi va zichligi bo‘yicha birinchi o‘rinda turadi.
Izoh (0)