АҚШнинг Шимолий Каролина штати Шарлотт шаҳридаги федерал суди Марказий разведка бошқармаси (МРБ) собиқ директори Дэвид Петреусни махфий ахборотларни жазманига билдиргани учун икки йилга шартли равишда озодликдан маҳрум этди. Бу ҳақда Associated Press агентлиги хабар бермоқда.
Шунингдек, Петреус 100 минг доллар миқдорида жарима ҳам тўлаши керак, ваҳоланки, айбловчи томон уни атиги 40 минг доллар миқдорида жарима тўлашга мажбур қилишни сўраган эди. Судья Дэвид Кесслернинг қайд этишича, Петреус томонидан амалга оширилган «жиноятнинг жиддийлиги» сабаб у жарима миқдорини ошириш ҳақида қарор қабул қилган.
Разведканинг собиқ раҳбари эса, ўз ўрнида, ўзига нисбатан илгари сурилган айбловни тўлиқ тан олган ва ўз ҳаракатлари учун кечирим сўраган.
Маълумот учун, Дэвид Петреус 37 йилдан ортиқ АҚШ қуролли кучларида хизмат қилган. 2011 йил сентябрида уни МРБ раҳбари этиб тайинлашганди. 2012 йил ноябрида эса ўз биографи Паула Бродвелл билан «юриб кетгани» учун истеъфо берганди.
2015 йил январида Петреус ўзининг таржимаи ҳолини ёзаётган Бродвеллга махфий агентларнинг исмлари ва уруш стратегиялари бўлган Афғонистондаги операцияларга оид ҳужжатларни топширганлик ва АҚШ президенти Барак Обама билан суҳбатлари мазмунини маълум қилганликда айбланди.
Изоҳ (0)