Suriya shimolidagi Manbij shahrida avtomobil portlashi oqibatida kamida 15 kishi halok bo‘ldi. Bu haqda SANA agentligi xabar berdi.
Hodisa Manbij shahri atrofidagi trassada yuz bergan. Qishloq xo‘jaligi ishchilarini tashiyotgan mashina yonida minalangan avtomobil portlagan. Qurbonlarning 14 nafari ayol va biri erkak hisoblanadi. Hodisa oqibatida 15 nafar ayol jarohatlangan, ulardan ayrimlarining ahvoli og‘ir.
Bu Manbijda so‘nggi bir necha kun ichida kuzatilgan ikkinchi shunday hodisadir. 1-fevral kuni shahar markazida minalashtirilgan avtomobil portlashi oqibatida 4 kishi halok bo‘lgandi. To‘qqiz kishi, shu jumladan, bolalar yaralangandi.
“Suriyaning tinch aholi yashaydigan hududlariga hujumlar davom etayotgani; 14 yilga cho‘zilgan, endi barham topgan Asad rejimining urushi ta’siridan o‘zini tiklashga urinayotgan paytda nishonga olinayotgani ularning hayotiga tahdid solmoqda. Gumanitar fojia chuqurlashmoqda, ta’lim va qishloq xo‘jaligi faoliyati hamda tirikchiligi izdan chiqmoqda, Suriyadagi gumanitar vaziyatni yomonlashtirmoqda”, dedi fuqaro mudofaasi tashkilotining direktor o‘rinbosari Munir Mustafo.
Asad rejimi qulashi
Noyabr oyi oxirida qurolli isyonchilar, asosan HTSH jangchilari Suriya shimoliy qismiga yurishni boshladi. Ular Idlib viloyatini, mamlakatdagi aholi soni bo‘yicha ikkinchi o‘rinda turuvchi Halab shahrini, Xama va Xoms viloyatlari hududlarining bir qismini o‘z nazoratiga oldi. Shundan so‘ng Damashqqa kirdi. Prezident Bashar Asad oilasi bilan mamlakatni tark etdi.
Rossiya Tashqi ishlar vazirligi Bashar Asad isyonchilar bilan kelishuvga erishib, iste’foga chiqishga rozi bo‘lgani, shundan keyin Suriyani tark etgani haqida ma’lumot berdi. Isyonchilar Asadni qo‘lga olishda yordam beradigan ma’lumot uchun 10 million dollar va’da qilgan.
Siyosatchi mamlakatni tark etganidan keyin isyonchilar Asad qarorgohiga bostirib kirgan, odamlar buyumlarni talon-toroj qilgan. Qarorgohdagi garajda BMW, Audi, Ferrari, Lamborghini Diablo kabi 50 ga yaqin hashamatli va qimmatbaho avtomobillar aniqlangan.
Kechroq Kremldagi manbalar Suriyadan qochgan prezident oilasi bilan Moskvaga kelgani, Putin ularga boshpana berganini ma’lum qildi. 10-dekabr kuni Idlib shahrida isyonchilarga rahbarlik qilgan Muhammad al-Bashir o‘zini Suriyaning o‘tish davri hukumati rahbari etib tayinlagandi. U fuqarolarga qarata qilgan televideniye murojaatida bu lavozimni kamida 2025-yil 1-martgacha egallab turishini aytgan. Endilikda al-Juloniy Suriya prezidenti deb e’lon qilindi.
Izoh (0)