Anqara Iroq va Suriya shimolidagi kurdlar tomonidan nazorat qilinadigan hududlarga zarba berdi, chunki bu hududlardan “terrorchilar Turkiyaga qarshi hujumlarda baza sifatida foydalangan”, deb xabar qildi Turkiya Mudofaa vazirligi.
Vazirlikning ta’kidlashicha, bu harakatlar “Tirnoq-qilich” operatsiyasi doirasida amalga oshirilgan, unda “Kurdiston ishchilar partiyasi” (KIP), Kurdiston jamoalari ittifoqi (KJI), kurd xalqining o‘zini o‘zi mudofaa qilish bo‘linmalarini zararsizlantirish maqsad qilingan.
Avvalroq Twitter’da Turkiya Mudofaa vazirligi “hisob-kitob” vaqti kelgani va “yomonlar xoinona hujumlari uchun javob berishi” haqida xabar qoldirgandi. Unga qiruvchi samolyotning parvozi aks ettirilgan fotosurat ilova qilingan. Keyinroq vazirlik yana bir tvit joylashtirdi. “Terrorchilarning inlari aniq zarbalar bilan yo‘q qilinadi”, — deyiladi u.
Haberturk muxbirining xabar berishicha, 19-noyabr kuni taxminan soat 21:00da (Toshkent vaqti bilan 23:00) Turkiyaning janubi-sharqida joylashgan Diyorbakir shahridagi aviabazadan samolyotlar havoga ko‘tarilgan, ikkinchi guruh parvozi 20-noyabr kuni soat 1:00 atrofida amalga oshirilgan, bu paytda ilgari jo‘nab ketgan o‘nta samolyot bazaga qaytgan.
Turkiya KIPni Istanbuldagi teraktni uyushtirganlikda ayblamoqda, partiya Anqarada terrorchi tashkilot hisoblanadi. 13-noyabr kuni shaharning mashhur piyodalar ko‘chalaridan biri – Istiqlolda portlash sodir bo‘lgan edi, oqibatda olti kishi halok bo‘ldi, kamida 81 kishi jarohatlandi.
Hujumda 1999-yilda tug‘ilgan Suriya fuqarosi Ahlam Albashir gumon qilinib, qo‘lga olindi. Turkiya politsiyasiga ko‘ra, u KIP bilan aloqasi borligini tan olgan. Portlash bilan bog‘liq holda jami 50 kishi hibsga olingan.
KIP hujumga aloqadorligini rad etdi. Tashkilot o‘z bayonotida “kurdlar tinch aholiga har qanday tarzda hujum qilishi mumkin emasligini” ta’kidlagan.
Izoh (0)