Сурия шимолидаги Манбиж шаҳрида автомобиль портлаши оқибатида камида 15 киши ҳалок бўлди. Бу ҳақда SANA агентлиги хабар берди.
Ҳодиса Манбиж шаҳри атрофидаги трассада юз берган. Қишлоқ хўжалиги ишчиларини ташиётган машина ёнида миналанган автомобиль портлаган. Қурбонларнинг 14 нафари аёл ва бири эркак ҳисобланади. Ҳодиса оқибатида 15 нафар аёл жароҳатланган, улардан айримларининг аҳволи оғир.
Бу Манбижда сўнгги бир неча кун ичида кузатилган иккинчи шундай ҳодисадир. 1 февраль куни шаҳар марказида миналаштирилган автомобиль портлаши оқибатида 4 киши ҳалок бўлганди. Тўққиз киши, шу жумладан, болалар яраланганди.
“Суриянинг тинч аҳоли яшайдиган ҳудудларига ҳужумлар давом этаётгани; 14 йилга чўзилган, энди барҳам топган Асад режимининг уруши таъсиридан ўзини тиклашга уринаётган пайтда нишонга олинаётгани уларнинг ҳаётига таҳдид солмоқда. Гуманитар фожиа чуқурлашмоқда, таълим ва қишлоқ хўжалиги фаолияти ҳамда тирикчилиги издан чиқмоқда, Суриядаги гуманитар вазиятни ёмонлаштирмоқда”, деди фуқаро мудофааси ташкилотининг директор ўринбосари Мунир Мустафо.
Асад режими қулаши
Ноябрь ойи охирида қуролли исёнчилар, асосан ҲТШ жангчилари Сурия шимолий қисмига юришни бошлади. Улар Идлиб вилоятини, мамлакатдаги аҳоли сони бўйича иккинчи ўринда турувчи Ҳалаб шаҳрини, Хама ва Хомс вилоятлари ҳудудларининг бир қисмини ўз назоратига олди. Шундан сўнг Дамашққа кирди. Президент Башар Асад оиласи билан мамлакатни тарк этди.
Россия Ташқи ишлар вазирлиги Башар Асад исёнчилар билан келишувга эришиб, истеъфога чиқишга рози бўлгани, шундан кейин Сурияни тарк этгани ҳақида маълумот берди. Исёнчилар Асадни қўлга олишда ёрдам берадиган маълумот учун 10 миллион доллар ваъда қилган.
Сиёсатчи мамлакатни тарк этганидан кейин исёнчилар Асад қароргоҳига бостириб кирган, одамлар буюмларни талон-торож қилган. Қароргоҳдаги гаражда BMW, Audi, Ferrari, Lamborghini Diablo каби 50 га яқин ҳашаматли ва қимматбаҳо автомобиллар аниқланган.
Кечроқ Кремлдаги манбалар Суриядан қочган президент оиласи билан Москвага келгани, Путин уларга бошпана берганини маълум қилди. 10 декабрь куни Идлиб шаҳрида исёнчиларга раҳбарлик қилган Муҳаммад ал-Башир ўзини Суриянинг ўтиш даври ҳукумати раҳбари этиб тайинлаганди. У фуқароларга қарата қилган телевидение мурожаатида бу лавозимни камида 2025 йил 1 мартгача эгаллаб туришини айтган. Эндиликда ал-Жулоний Сурия президенти деб эълон қилинди.
Изоҳ (0)