Suriyadagi AQSH bazasiga dronlar hujum qildi. Jarohatlanganlar bor

Suriyaning Al-Tanf tumanidagi AQSH bazasiga uchta uchuvchisiz uchish apparati hujum qildi. Bu haqda The Reuters xabar berdi.

AQSH harbiylari bayonotida aytilishicha, amerikalik askarlardan hech kim jabrlanmagan. Ikkita dron urib tushirilgan, qolgan uchuvchisiz uchish apparati esa Suriya Ozod Armiyasi kuchlarining ikki a’zosini jarohatlagan.

“Bunday hujumlarni qabul qilib bo‘lmaydi — ular bizning qo‘shinlarimiz va hamkorlarimizni xavf ostiga qo‘yadi, ISHIDga qarshi kurashga xavf soladi”, — deyiladi bayonotda.

Hujum uchun javobgarlikni hozircha hech bir guruh o‘z zimmasiga olmadi. Suriyada AQSHning 900 ga yaqin askarlari bor, ular mamlakat shimoliga, janubi va sharqiga joylashtirilgan.

Noyabr oyida Suriya shimoli-sharqidagi AQSH harbiy patrul bazasiga ikkita raketa uchirilgan. Raketa hujumi oqibatida Turkiya—Suriya chegarasidan taxminan 100 kilometr uzoqlikdagi baza jiddiy talafot ko‘rmagan.

Oktabr oyida ham noma’lum dron Suriya janubi-sharqidagi AQSH harbiy bazasini raketa bilan o‘qqa tutgandi. Aviazarbalardan so‘ng bazada bir necha portlash sodir bo‘lgan, shundan so‘ng yong‘in boshlangan. Shuningdek, oy boshida ham AQSH va G‘arb koalitsiyasining Suriyadagi harbiy bazasi raketa bilan o‘qqa tutilgan, zarba oqibatida hech kim jabrlanmagan.