Turkiya Iroq va Suriyadagi kurdlarga qarshi operatsiyada 89 ta nishonni urganini ma’lum qildi (video)

Turkiya Mudofaa vazirligining ma’lum qilishicha, Iroq va Suriya shimolidagi kurd jangarilari bazalariga berilgan aviazarbalarda 89 ta nishon, jumladan, boshpana va o‘q-dorilar ombori yo‘q qilindi. Reuters mahalliy manbaga tayanib, Turkiya havo kuchlarining Xasaka viloyatiga hujumi chog‘ida uch nafar suriyalik harbiy halok bo‘lganini xabar qilmoqda. Suriyaning SANA davlat agentligi Aleppo va Hasek viloyatlarida bir necha askar halok bo‘lganini ma’lum qildi.

Turkiya hujumlari Iroqning Qandil, Asos va Xakurk hududlariga hamda Suriya shimolidagi Kobani, Tal-Rifat, Jizira va Derik shaharlariga uyushtirilgan, deb yozmoqda Reuters Turkiya Mudofaa vazirligiga tayanib. Unda qayd etilishicha, “zararsizlantirilganlar orasida terror tashkilot yetakchilari ham bor”.

20-noyabr kuni ertalab Anqara Iroq va Suriya shimolidagi kurdlar tomonidan nazorat qilinadigan hududlarga zarba bergani, chunki bu hududlardan “terrorchilar Turkiyaga qarshi hujumlarda baza sifatida foydalangan”i haqida e’lon qilgandi.

Bu harakatlar “Tirnoq-qilich” operatsiyasi doirasida amalga oshirilgan, unda “Kurdiston ishchilar partiyasi” (KIP), Kurdiston jamoalari ittifoqi (KJI), kurd xalqining o‘zini o‘zi mudofaa qilish bo‘linmalarini zararsizlantirish maqsad qilingan.

Ayni paytda Turkiya kurdlarga qarshi havo operatsiyasi yakunlanganini ma’lum qildi. Operatsiyaga 50 dan ortiq samolyot va 20 ta dron jalb qilingan.

Turkiya KIPni Istanbuldagi teraktni uyushtirganlikda ayblamoqda, partiya Anqarada terrorchi tashkilot hisoblanadi. 13-noyabr kuni shaharning mashhur piyodalar ko‘chalaridan biri – Istiqlolda portlash sodir bo‘lgan edi, oqibatda olti kishi halok bo‘ldi, kamida 81 kishi jarohatlandi.

Hujumda 1999-yilda tug‘ilgan Suriya fuqarosi Ahlam Albashir gumon qilinib, qo‘lga olindi. Turkiya politsiyasiga ko‘ra, u KIP bilan aloqasi borligini tan olgan. Portlash bilan bog‘liq holda jami 50 kishi hibsga olingan.

KIP hujumga aloqadorligini rad etdi. Tashkilot o‘z bayonotida “kurdlar tinch aholiga har qanday tarzda hujum qilishi mumkin emasligini” ta’kidlagan.